ગિલગીટમાં પાક.વિરોધી દેખાવો, લોકોએ તીરંગા લેહરાવ્યા
વિરાટ રેલીમાં હજારો લોકો જોડાયા, ભારતની મદદ માંગી
પાકિસ્તાનના કબ્જા હેઠળના ગિલગિટ બાલ્ટિસ્તાનમાં પ્રજાનો એક મોટો વર્ગ પાકિસ્તાની સરકારથી છુટકારો મેળવવા ઈચ્છી રહ્યો છે.
ગિલગિટ બાલ્ટિસ્તાનમાં હવે રોજ પાકિસ્તાન વિરોધી દેખાવો થઈ રહ્યા છે. પાકિસ્તાની સરકારના શાસનમાં જીવન નર્ક બની રહ્યુ હોવાનુ હવે ત્યાંના લોકોને લાગી રહ્યુ છે. પાકિસ્તાનથી આઝાદ થઈને ભારતમાં જોડાવા માટેની માંગણી બુલંદ બની રહી છે.
હવે ગિલગિટ બાલ્ટિસ્તાનમાં થયેલા દેખાવોનો વધુ એક વિડિયો સામે આવ્યો છે. જેમાં લોકોએ મોટી સંખ્યામાં રસ્તા પર રેલી કાઢી હતી અને પાકિસ્તાન મુર્દાબાદના નારા લગાવ્યા હતા. અહીંયા લોકો ભારતના તિરંગા પણ ઈમારતો પર લહેરાવી રહ્યા છે.
સ્થાનિક લોકોએ ચીનની વેબસાઈટ પર જઈને પણ વિરોધ નોંધાવવાનુ શરુ કર્યુ છે અને ગિલગિટ બાલ્ટિસ્તાનની જમીન ચીનને વેચવા બદલ પાકિસ્તાની સરકારને લોકો ગાળો પણ આપી રહ્યા છે.
ઉલ્લેખનીય છે કે તાજેતરમાં શિયા ધર્મગુરુ આગા બાકિર અલ હુસૈનીએ ધાર્મિક અપમાન અંગેના કાયદાઓ પર ટિપ્પણી કરવા બદલ ધરપકડ બાદ લોકોનો રોષ ફાટી નીકળ્યો છે. હાલત એટલા સ્ફોટક છે કે, કલમ 144 લગાવ્યા બાદ પણ ઠેર ઠેર દેખાવો ચાલી રહ્યા છે. મોબાઈલ અને ઈન્ટરનેટ પર પણ સરકારે બેન મુકી દીધો છે. અહીંયા આર્મીના 20,000 વધારાના જવાનો તૈનાત કરવામાં આવ્યા છે.
