આંગણવાડી બહેનોને BLOની કામગીરી માટે માનસિક દબાણ : રાજકોટમાં પ્રોગ્રામ ઓફિસર દ્વારા મૌન સેવી લેવાતા કર્મીઓની હાલત કફોડી
રાજકોટ સહિત રાજ્યભરમાં હાલમાં એસઆઇઆર અંતર્ગત મતદાર યાદીની સઘન સુધારણા કામગીરી ચાલી રહી છે ત્યારે આંગણવાડી કાર્યકર બહેનોને ધરારથી ચૂંટણી કામગીરીમાં જોતરી દેવામાં આવ્યા હોવાથી કર્મચારીઓમાં રોષ જોવા મળી રહ્યો છે. આંગણવાડી બહેનોના જણાવ્યા મુજબ કેન્દ્ર સરકારે તમામ આંગણવાડી બહેનો અને તેડાગર બહેનોને પોષણ સિવાયની અન્ય કામગીરી ન સોંપવા સ્પષ્ટ પરિપત્ર કર્યો હોવા છતાં પણ પ્રોગ્રામ ઓફિસરને કારણે બહેનોને માનસિક દબાણ હેઠળ કામ કરવું પડતું હોવાનું જણાવી રહ્યા છે.
રાજકોટ શહેરમાં આંગણવાડી કર્મચારી બહેનો દ્વારા અનેક વિરોધ કરવા છતાં બીએલઓ તરીકે મુકવામાં આવ્યા હોવાથી બાળકોની પોષણ સહિતની કામગીરીને માઠી અસર પડી રહી છે. ભારતીય મજદૂર સંઘ સંગઠન સાથે જોડાયેલ રાજકોટ આંગણવાડી સંગઠન પ્રમુખ ભાવિકાબેન ચાઉના જણાવ્યા મુજબ કેન્દ્ર સરકાર દ્વારા તમામ આંગણવાડી બહેનોને પોષણ સિવાયની કામગીરી ન સોંપવા માટે ઓક્ટોબર -2025માં સ્પષ્ટ આદેશ કરવામાં આવ્યો હોવા છતાં પણ પ્રોગ્રામ ઓફીસર દ્વારા મૌન સેવી લેવામાં આવતા હાલમાં અનેક બહેનોને આંગણવાડીની અનેકવિધ કામગીરી સાથે બીએલઓની કામગીરી માનસિક યાતાના સાથે કરવી પડી રહી હોવાનો આરોપ લગાવ્યો હતો.
