દીકરીના પહેલા બર્થડેના સેલિબ્રેશન વચ્ચે ઇમારત ધરાશાયી, આખા પરિવાર સહિત 15 લોકોના મોત, વિરાર દુર્ઘટનાની કહાની સાંભળીને તમે રડી પડશો
મહારાષ્ટ્રના પાલઘર જિલ્લાના વસઈ વિરારમાં મોટી દુર્ઘટના સામે આવી છે જેમાં મંગળવાર રાત્રે એક ચાર માળની રહેણાંક ઇમારત ધરાશાયી થતાં કાટમાળમાં 20 થી 25 લોકો ફસાયા હોવાની આશંકા છે. તાજેતરના અપડેટ્સ અનુસાર, આ અકસ્માતમાં 15 લોકોના મોત થયા છે અને NDRFનું શોધખોળ અભિયાન હજુ પણ ચાલુ છે. એવું કહેવામાં આવી રહ્યું હતું કે ઇમારત એટલી સાંકડી ગલીમાં હતી કે ત્યાં કોઈ વાહન કે એમ્બ્યુલન્સ બચાવ માટે જઈ શકતી ન હતી. આવી સ્થિતિમાં, NDRF ટીમને મેન્યુઅલ બચાવ કામગીરી હાથ ધરવી પડી, જેમાં ઘણો સમય લાગ્યો. ટીમને ડર છે કે કેટલાક લોકો હજુ પણ કાટમાળમાં ફસાયેલા હોઈ શકે છે. જ્યારે આ દુર્ઘટના ઘટી થયો ત્યારે બિલ્ડિંગના ચોથા માળે જન્મદિવસની પાર્ટી ચાલી રહી હતી પરિવાર દીકરીના પહેલો જન્મદિવસની ઉજવણી કરી રહ્યો હતો અને ઇમારત ધરાશાયી થતાં તેનું પણ તેના પરિવાર સાથે મોત નીપજ્યું હતું.
શું છે સમગ્ર ઘટના?
આ ઇમારત ત્યારે ધરાશાયી થઈ જ્યારે જોયલ પરિવાર વિરાર (પૂર્વ) ના વિજય નગરમાં તેમની માસૂમ પુત્રી ઉત્કર્ષાના પહેલા જન્મદિવસની ઉજવણી કરી રહ્યો હતો. પરિવારે ઘરને સજાવ્યું, કેક કાપી અને ખુશીના ક્ષણોને તસવીરોમાં કેદ કર્યા અને ફોટા તેમના સંબંધીઓને પણ મોકલ્યા. આ લોકોને ક્યાં ખબર હશે કે તેઓ પણ હવે બસ એક યાદ બનીને રહી જશે. કેક કાપ્યાના માત્ર પાંચ મિનિટ પછી, રમાબાઈ એપાર્ટમેન્ટનો પાછળનો ભાગ નજીકની ચાલ પર તૂટી પડ્યો, જેના કારણે આખું વાતાવરણ શોકમાં ફેરવાઈ ગયું. આ અકસ્માતમાં માસૂમ ઉત્કર્ષ અને તેની માતા આરોહી જોયલનું મૃત્યુ થયું, જ્યારે પિતા ઓમકાર જોયલનો હજુ સુધી કોઈ પત્તો લાગ્યો નથી.
સ્થાનિક લોકોએ લોકોના જીવ બચાવ્યા
તે જ સમયે, અકસ્માત પછી તરત જ, NDRF ટીમ આવે તે પહેલાં, સ્થાનિક નાગરિકોએ હિંમત બતાવી અને કાટમાળમાંથી સાત લોકોને સુરક્ષિત રીતે બચાવ્યા. તેમાંથી કેટલાકને નાની ઇજાઓ થઈ હતી, જેમને વિરાર અને નાલાસોપારાની હોસ્પિટલોમાં દાખલ કરવામાં આવ્યા છે.
વસઈ-વિરાર શહેરમાં ગેરકાયદેસર અને અનધિકૃત ઇમારતોનું નેટવર્ક સતત લોકોના જીવનને નુકસાન પહોંચાડી રહ્યું છે. આ પહેલો અકસ્માત નથી. 15 દિવસ પહેલા ગેરકાયદે બાંધકામમાં કાચનો સ્લેબ પડવાથી બે કામદારોના મોત થયા હતા. તેમ છતાં, સ્થાનિક વહીવટીતંત્રની બેદરકારી અને સુસ્ત કાર્યશૈલી પર ગંભીર પ્રશ્નો ઉભા થઈ રહ્યા છે.
બિલ્ડર અને જમીન માલિક વિરુદ્ધ FIR નોંધાઈ
વિરાર પોલીસે બિલ્ડર નીતલ ગોપીનાથ સાને અને આ અકસ્માત માટે જવાબદાર જમીન માલિક વિરુદ્ધ કેસ નોંધ્યો છે. આ કેસ મહારાષ્ટ્ર રિજનલ ટાઉન પ્લાનિંગ એક્ટની કલમ ૫૨, ૫૩ અને ૫૪ અને ભારતીય દંડ સંહિતા (BNS) ની કલમ ૧૦૫ હેઠળ નોંધવામાં આવ્યો છે. જોકે, આ કેસમાં હજુ સુધી કોઈ ધરપકડ કરવામાં આવી નથી.
