કાશ્મીરથી ઈરાન માટે સહાય: કાશ્મીરમાં સહાય ભંડોળ એકત્ર કરાયું, બાળકોએ પિગી બેંક ખોલી, મહિલાઓએ ઘરેણા આપ્યા
પશ્ચિમ એશિયામાં ચાલી રહેલા યુદ્ધના કારણે પ્રભાવિત ઈરાનને મદદરૂપ થવા કાશ્મીરમાં સહાય ભંડોળ એકત્ર કરવામાં આવી રહ્યું છે. કેટલાક વિસ્તારોમાં ઈદ પછીના દિવસે ખાસ કરીને શિયા વસ્તી ધરાવતા બુડગામ અને બારામુલ્લા વિસ્તારોમાં યુવાનો ઘરઘર જઈ દાન એકત્ર કરતા જોવા મળ્યા હતા.
અધિકારીઓના જણાવ્યા મુજબ લોકો દ્વારા રોકડ રકમ, સોનું-ચાંદી, તાંબાના વાસણો સહિત કિંમતી ઘરેલુ સામાન દાનરૂપે આપવામાં આવ્યો છે. કેટલીક પરિવારો દ્વારા પશુઓ પણ અર્પણ કરવામાં આવ્યા હોવાનું સામે આવ્યું છે. આ અભિયાનમાં સમાજના દરેક વર્ગના લોકો — પુરુષો, મહિલાઓ અને બાળકો —ઉત્સાહભેર જોડાયા હતા.
ખાસ કરીને મહિલાઓએ પોતાના ઘરેણાં અને કિંમતી સામાન દાનમાં આપીને સહાનુભૂતિ વ્યક્ત કરી હતી, જ્યારે બાળકોે પોતાની બચત અને પિગી બેંક તોડી સહભાગી બન્યા હતા. રૈનાવારીના નિવાસી એજાઝ અહમદે જણાવ્યું હતું કે “ઈઝરાયેલ અને તેના સમર્થકો દ્વારા ઈરાન પર લાદવામાં આવેલા આ યુદ્ધથી ભારે વિનાશ સર્જાયો છે, અને સંસ્કારી વિશ્વ તરીકે પીડિતોને મદદ કરવી આપણી ફરજ છે.”
આ પણ વાંચો: ભારતનો પ્લાન બી તૈયાર: મિડલ ઈસ્ટમાં યુદ્ધ વચ્ચે વડાપ્રધાન મોદીનું નિવેદન, કહ્યું-“કટોકટી છે, પરંતુ ગભરાશો નહીં”
એકત્રિત કરાયેલું દાન સત્તાવાર રાહત સંસ્થાઓ તથા ઈરાન દૂતાવાસ મારફતે જરૂરિયાતમંદો સુધી પહોંચાડવાની પ્રક્રિયા હાથ ધરવામાં આવશે. આ માનવતાભર્યા પ્રયાસ બદલ ઈરાન દૂતાવાસે સોશિયલ મીડિયા પર આભાર વ્યક્ત કરતાં કહ્યું હતું કે કાશ્મીરના લોકોની આ સહાનુભૂતિ અને મદદ ક્યારેય ભૂલાશે નહીં. “તમારી દયાળુતા અને માનવતા માટે અમે હંમેશા આભારી રહીશું. આભાર, ભારત,” એમ દૂતાવાસે ટ્વીટ કર્યું હતું.
