સોના-ચાંદી બાદ હવે કોપરનો હોટ ટ્રેન્ડ! 1 કિલોના બારનું ધૂમ વેચાણ: ડિમાન્ડ વધી, હાજર સ્ટોકની અછત,જાણો કોપરમાં રોકાણ કેમ વધ્યું..?

સોના-ચાંદી મોંઘાં થતા રોકાણકારોની નજર કોપર પર પડી છે ને કોપર બારમાં ધૂમ વેચાણ થઈ રહ્યા છે. સોના અને ચાંદીનાં વધતા ભાવના વલણ વચ્ચે હવે રોકાણકારોમાં કોપર તરફ રસ વધતો જઈ રહ્યો છે. છેલ્લા ત્રણ મહિનાથી ગોલ્ડ-સિલ્વર સાથે કોપરને વિકલ્પ રોકાણ તરીકે જોવામાં આવી રહ્યું છે, જેના કારણે બજારમાં કોપર બારનું ધૂમ વેચાણ શરૂ થયું છે.

સોના અને ચાંદીનાં બિસ્કિટની જેમ હવે એક કિલો વજનનાં કોપર બિસ્કિટ પણ બજારમાં સરળતાથી ઉપલબ્ધ બન્યા છે. રોકાણકારો ઓછા ભાવમાં લાંબા ગાળાના લાભની અપેક્ષાથી કોપરમાં રોકાણ તરફ વળી રહ્યા છે.વિશેષ વાત એ છે કે માત્ર જવેલર્સ જ નહીં, પરંતુ મેટલ-સ્ક્રેપ અને વાસણના વેપારીઓ પણ હવે કોપર બારનું વેચાણ શરૂ કરી ચૂક્યા છે. બજાર નિષ્ણાતોના મતે આવનારા સમયમાં કોપર રોકાણનો ટ્રેન્ડ વધુ મજબૂત બની શકે છે. સોના અને ચાંદીનાં વધતા ભાવ વચ્ચે હવે રોકાણકારો વિકલ્પ રૂપે કોપર તરફ વળી રહ્યા છે. રાજકોટનાં વેપારી પ્રતિક શેઠે જણાવ્યું કે, સોના-ચાંદીનાં વિકલ્પ તરીકે ખાસ કરીને મિડલ ક્લાસ વર્ગે કોપરને ઇન્વેસ્ટમેન્ટ માટે પસંદ કર્યું છે.

આ પણ વાંચો :‘ના રિસ્પેક્ટ મળી રહી હતી, ના સપોર્ટ…’ યુવરાજ સિંહે ક્રિકેટ છોડવાનું અસલી કારણ જણાવી કહ્યું-મારી રમતની કદર જ થઇ રહી નહોતી

તેમણે વધુમાં જણાવ્યું કે છેલ્લા ત્રણ દિવસથી જેમ જેમ ચાંદીનાં ભાવમાં ઉછાળો આવી રહ્યો છે, તેમ તેમ કોપર બારની ડિમાન્ડમાં પણ નોંધપાત્ર વધારો થયો છે. હાલ સ્થિતિ એવી છે કે સપ્લાય સામે ડિમાન્ડ વધારે જોવા મળી રહી છે. બજારના આંકડા મુજબ એક જ દિવસમાં કોપરના ભાવમાં અંદાજે રૂા.1000નો ઉછાળો નોંધાયો છે. ગુરુવારે એક કિલો કોપર બારનો ભાવ રૂા.1350 રહ્યો હતો. બજાર સૂત્રોના અંદાજ મુજબ એક વેપારીએ એક જ દિવસમાં 50 કિલોથી વધુ કોપર બારનું વેચાણ કર્યું છે.  વેપારીઓના મતે જો ગોલ્ડ-સિલ્વરના ભાવ ઊંચા જ રહે તો આવનારા દિવસોમાં કોપર રોકાણનો ટ્રેન્ડ વધુ મજબૂત બની શકે છે.

ડિમાન્ડ વધી, હાજર સ્ટોકની અછત

છેલ્લા બે દિવસમાં કોપર બારનું વેચાણ અચાનક વધી ગયું છે, સોના-ચાંદીનાં ભાવમાં સતત ઉછાળાની અસર તરીકે રોકાણકારોમાં કોપર તરફ ઝુકાવ વધ્યો છે. વધતી ડિમાન્ડ સામે હાલ બજારમાં હાજર સ્ટોક ઓછો પડતો જોવા મળી રહ્યો છે, જેના કારણે કેટલાક વેપારીઓને નવી સપ્લાય માટે રાહ જોવી પડી રહી છે. વેપારીઓ જણાવે છે કે  ઇન્વેસ્ટમેન્ટ હેતુથી કોપર બારની ખરીદી વધી હોવાથી બજારમાં સ્ટોકની અછત સર્જાઈ છે અને આગામી દિવસોમાં ડિમાન્ડ વધવાની શક્યતા છે.

‘કોપર’માં રોકાણ કેમ વધ્યું..? તજજ્ઞોએ આપ્યાં કારણો

• સોના-ચાંદી મોંઘાં થયા, સામાન્ય રોકાણકાર માટે કોપર સસ્તો વિકલ્પ બની રહ્યો છે.
• ઓછા ભાવમાં રોકાણ શક્યઃ એક કિલો કોપર બાર ઓછા ખર્ચે મળી જતા મિડલ ક્લાસ વર્ગ
  સરળતાથી રોકાણ કરી શકે છે.
• ભાવ વધવાની સંભાવનાઃ ઇન્ડસ્ટ્રીયલ ઉપયોગ વધતાં કોપરના ભાવમાં આગળ જઈ વધારો થવાની
  અપેક્ષા રાખવામાં આવે છે.
• ટૂંકા ગાળાનો નફોઃ છેલ્લા દિવસોમાં ભાવમાં ઝડપથી ઉછાળો આવતાં ટ્રેિંડગ માટે પણ કોપર
  આકર્ષક બન્યું છે.
• ફિઝિકલ એસેટનો વિશ્વાસઃ લોકો શેર-મ્યુચ્યુઅલ ફંડની સામે હાથમાં રાખી શકાય તેવું મેટલ
  રોકાણ વધુ સુરક્ષિત માને છે.
• સપ્લાય-ડિમાન્ડનું ફેક્ટરઃ હાલ ડિમાન્ડ સપ્લાય કરતાં વધુ હોવાથી ભાવ વધવાનો ટ્રેન્ડ મજબૂત થયો છે.