અભિનેતા સોનુ સૂદ ફરીવાર બન્યા ‘રિયલ લાઈફ હીરો’: દુબઈમાં યુદ્ધમાં ફસાયેલા લોકો માટે રહેવા-જમવાની કરી મફત વ્યવસ્થા
બોલીવુડ અભિનેતા સોનું સુદને એમ જ રિયલ લાઈફ હીરો કહેવામાં નથી આવતા. તેઓ અવાર-નવાર જરૂરિયાતમંદ લોકોની વહારે આવતા હોય છે. હજુ થોડા સમય પહેલા જ તેમણે રાજપાલ યાદવની મદદ કરી હતી અને અન્ય લોકોને પણ મદદ કરવા માટે આગળ આવવા અપીલ કરી હતી ત્યારે હવે મસીહા સોનું સુદે પશ્ચિમ એશિયામાં ચાલી રહેલા તણાવ વચ્ચે ફરી એકવાર માનવતાનું ઉદાહરણ રજૂ કર્યું છે.
એક વિડિઓ દ્વારા માહિતી કરી શેર
ગુરુવારે, સોનુ સૂદે જાહેરાત કરી હતી કે તેઓ દુબઈમાં ફસાયેલા લોકો માટે મફત રહેવાની વ્યવસ્થા કરી રહ્યા છે. તેમણે સોશિયલ મીડિયા પર એક વિડિઓ શેર કર્યો હતો, જેમાં કહ્યું હતું કે આ કટોકટીને કારણે દુબઈમાં ફસાયેલા અને રહેવાની જગ્યા ન ધરાવતા લોકો તેમનો સંપર્ક કરી શકે છે. તેમણે ખાતરી આપી હતી કે આવા લોકોને મફત રહેવાની વ્યવસ્થા કરવામાં આવશે.
ભારતીય હોય કે અન્ય કોઈ દેશના નાગરિક
વીડિયોમાં, સોનુએ કહ્યું, “જો કોઈ આ કટોકટીના સમયમાં દુબઈમાં ફસાયેલું હોય, તો અમે ફક્ત એટલું જ કહેવા માંગીએ છીએ કે તમારી પાસે રહેવાની જગ્યા છે.” અમે ખાતરી કરીશું કે તમને મફત રહેવાની વ્યવસ્થા મળે.’
તેમણે વધુમાં જણાવ્યું હતું કે દુબઈમાં ફસાયેલા કોઈપણ, પછી ભલે તે ભારતીય હોય કે અન્ય કોઈ દેશના, તેમણે તેમને સીધા તેમના સોશિયલ મીડિયા એકાઉન્ટ્સ પર મેસેજ કરવો જોઈએ અને તેમની માહિતી શેર કરવી જોઈએ.
52 વર્ષીય સોનુ સૂદને ઘણીવાર ‘વાસ્તવિક જીવનનો હીરો’ કહેવામાં આવે છે. કોવિડ-19 મહામારી દરમિયાન, તેમણે હજારો સ્થળાંતરિત કામદારોને ખોરાક અને આશ્રય પૂરો પાડીને, તેમને ઘરે પહોંચાડીને મદદ કરી હતી.
