વાજડી ગઢ-વેજાગામના ‘અચ્છે દિન’ હવે દૂર નથી : ત્રણ ટાઉન પ્લાનિંગ સ્કીમ તૈયાર, રૂડાની બોર્ડ બેઠકમાં રજૂ કરી સરકારમાં મોકલાશે
કોઈ પણ શહેરનો વિકાસ કરવો હોય તો ટાઉન પ્લાનિંગ અત્યંત જરૂરી હોવાથી રાજકોટ મહાપાલિકા તેમજ રાજકોટ અર્બન ડેવલપમેન્ટ ઓથોરિટી (રૂડા) દ્વારા એક બાદ એક ટાઉન પ્લાનિંગ સ્કીમ તૈયાર કરાઈ રહી છે ત્યારે `રૂડા’ દ્વારા આવી ત્રણ ટાઉન પ્લાનિંગ સ્કીમ કે જેને વાજડીગઢ-વેજાગામ ખાતે તૈયાર કરાઈ રહી છે ત્યારે તે હવે આખરી તબક્કામાં હોવાનું જાણવા મળ્યું છે. ટાઉન પ્લાનિંગ સ્કીમ તૈયાર કરાયાબાદ વાંધા-સૂચન મંગાવાયા હતા જેને શુક્રવારે રૂડાની બોર્ડ બેઠકમાં રજૂ કરી સરકાર તરફ રવાના કરવામાં આવશે.
શુક્રવારે મળનારી બોર્ડ બેઠકમાં ટાઉન પ્લાનિંગ સ્કીમ નં.80 (વાજડીગઢ-વેજાગામ)ની કાર્યવાહી કરી વાંધા-સૂચન તેમજ રજૂઆત મંગાવવામાં આવ્યા હતા જે આવી જતાં બોર્ડ બેઠકમાં મુકાશે. આ ઉપરાંત ટાઉન પ્લાનિંગ સ્કીમ નં.81 (વેજાગામ) અને ટાઉન પ્લાનિંગ સ્કીમ નં.82 (વેજાગામ)ના સુચન, વાંધા અને રજૂઆત બોર્ડ બેઠકમાં રજૂ કરી ચર્ચા કરાયા બાદ તેને સરકારમાં મોકલવામાં આવશે. એકંદરે આ ત્રણેય ટાઉન પ્લાનિંગ સ્કીમ ફાઈનલ કરવાની હોય આ બોર્ડ બેઠક ખૂબ જ મહત્ત્વની બની રહેશે.
સરકાર તરફથી ત્રણેય ટાઉન પ્લાનિંગ સ્કિમ તૈયાર કરવા માટે ગ્રીન સિગ્નલ મળતાં જ કપાત સહિતની કાર્યવાહી શરૂ કરવામાં આવશે. અત્રે એ પણ ઉલ્લેખનીય છે કે રૂડા હસ્તકના વિસ્તારમાં આવનારા સમયમાંથી 40 જેટલી ટાઉન પ્લાનિંગ સ્કીમ તૈયાર કરવામાં આવનાર છે.
