આગ્રા લખનૌ એક્‍સપ્રેસ- વે પર અકસ્‍માત : કાર ડિવાઈડર સાથે ટકરાઇ ફંગોળાતા 5 ડૉક્ટરના મોત

2 weeks પહેલા

દેશમાં માર્ગ અકસ્માતની ઘટનામાં નોંધપાત્ર વધારો થઈ રહ્યો છે. ત્યારે વધુ એક ગોઝારા અકસ્માતની ઘટના આગરા લખનૌ એક્‍સપ્રેસ- વે પર સામે આવી છે. આ દુર્ઘટનામાં 5 ડૉક્‍ટરોના મોત થયા છે અને એક ડૉક્‍ટર ઘાયલ છે. આ તમામ કારમાં લગ્ન પ્રસંગમાંથી પરત ફરી રહ્‍યા હતા. માહિતી મળ્‍યા બાદ પોલીસ ઘટનાસ્‍થળે પહોંચી હતી અને મૃતદેહોને કારમાંથી બહાર કાઢવામાં આવ્‍યા હતા. આ તમામ લખનૌથી પરત ફરી રહ્‍યા હતા ત્‍યારે સવારે લગભગ ૪ વાગે આ અકસ્‍માત થયો હતો. તમામ મળતકોની ઓળખ કરી લેવામાં આવી છે. આ પાંચ ડોકટરો સૈફઈ મેડિકલ કોલેજમાં કાર્યરત હતા.

પ્રાપ્ત માહિતી અનુસાર, સ્કોર્પિયોમાં સવાર લોકો લખનૌથી લગ્ન સમારોહમાં હાજરી આપીને મોડી રાત્રે સૈફઈ પરત જઈ રહ્યા હતા. ત્યારબાદ સવારે લગભગ 4 વાગ્યે કન્નૌજના તિરવા વિસ્તારમાં તેમની કાર ડિવાઈડર સાથે અથડાઈ અને બીજી લેનમાં આવીને ટ્રક સાથે અથડાઈ. આ અથડામણ એટલી ભીષણ હતી કે પાંચ લોકોના કરૂણ મોત થયા હતા, જ્યારે એક ગંભીર રીતે ઘાયલ થયો હતો. તેને સારવાર માટે સૈફઈ મેડિકલ કોલેજમાં રિફર કરવામાં આવ્યો છે.

સ્કોર્પિયોમાં 6 લોકો હતા, 5 મૃત્યુ પામ્યા

સ્કોર્પિયોમાં સવાર યુવક સૈફઈ મેડિકલ કોલેજમાં પીજીનો વિદ્યાર્થી હતો. ગઈ કાલે લખનૌમાં એક લગ્નમાં ગયો હતો. પરત ફરતી વખતે સ્કોર્પિયોમાં 6 લોકો બેઠા હતા. આ દરમિયાન તેમની કાર લખનૌ-આગ્રા એક્સપ્રેસ વેના કિલોમીટર નંબર 196 પર કાબૂ બહાર ગઈ હતી અને ડિવાઈડર તોડીને બીજી લેનમાં આવી ગઈ હતી. ત્યારે સામેથી આવતી ટ્રકે સ્કોર્પિયોને ટક્કર મારી હતી. જેના કારણે આગરાના રહેવાસી પવન કુમાર વર્માના પુત્ર ડૉ.અનિરુદ્ધ વર્મા સહિત પાંચ લોકોના મોત થયા હતા. તે જ સમયે, એક ગંભીર રીતે ઘાયલ થયો હતો.

આ મામલામાં તિરવા મેડિકલ કોલેજના પ્રિન્સિપાલ ડૉ. સી.પી. પાલે જણાવ્યું હતું કે યુપેડાના વાહનમાં 6 લોકોને અહીં લાવવામાં આવ્યા હતા, જેમાંથી પાંચના મોત થયા હતા. જ્યારે એકને ગંભીર ઇજા પહોંચી હતી. તમામ સૈફાઈ મેડિકલ કોલેજના પીજી વિદ્યાર્થીઓ હતા. મૃતદેહોને મોર્ચરીમાં રાખવામાં આવ્યા છે. પોલીસે સંબંધીઓ અને સૈફાઈ મેડિકલ કોલેજના વહીવટીતંત્રને જાણ કરી છે. આગળની કાયદેસરની કાર્યવાહી હાથ ધરી છે.