ફટાકડા ભરી અયોધ્યા જતા ટ્રકમાં આગ લાગી અને જુઓ પછી શું થયું..
ઉત્તર પ્રદેશના ઉન્નાવ જિલ્લામાં ફટાકડાથી ભરેલી ટ્રકમાં આગ લાગી હતી. આ આગને કારણે ટ્રકમાં ભરેલા ફટાકડા ધડાધડ ફુટવા લાગ્યા હતા, જેને પગલે ત્રણ કલાક સુધી તો રસ્તા પર જાણે દિવાળી જેવું દ્રશ્ય જોવા મળ્યું હતું. પ્રાપ્ત વિગતો મુજબ આ ટ્રક પર તામિલનાડુંની નંબર પ્લેટ લાગેલી હતી જે ફટાકડા લઈને અયોધ્યા તરફ જઈ રહી હતી.
આ ઘટના પૂરવા કોતવાલીના ખરગી ખેડા ગામ નજીક બની હતી. આગને કારણે લાખોની કિંમતના ફટાકડાની સાથે ટ્રક પણ બળીને ખાખ થઈ ગઈ હતી. જો કે આ ઘટનામાં જ્યારે ડ્રાઈવરને આગ લાગવાની જાણ થઈ ત્યારે તેણે પોતાની સુઝબુઝથી ટ્રકને ભીડવાળા વિસ્તારમાંથી દૂર લઈ જઈને ટ્રકને ઉભી રાખીને ડ્રાઈવરે અને ક્લીનરે પોતાનો જીવ બચાવ્યો હતો અને મોટી જાનહાની થતા પણ ટાળી હતી.
ટ્રકમાં ભરેલા ફટાકડા ધડાધડ ફુટવા લાગતા આતશબાજીનો નજારો જોવા મળ્યો હતો અને આ આગ લાગવાની ઘટનાની જાણ થતાં જ પોલીસ અને ફાયર વિભાગની ટીમ ઘટનાસ્થળે પહોંચી હતી અને ભારે જહેમત બાદ આગ પર કાબૂ મેળવ્યો હતો.