186 કરોડના ખર્ચે મોરબી હાઈ-વે થી અમદાવાદ હાઈ-વે સુધીનો 11 કિ.મી. રસ્તો નવો બનશે: કાંગશિયાળી ગામે પાણી સપ્લાય કરવા ખર્ચાશે 29 કરોડ
રાજકોટ અર્બન ડેવલપમેન્ટ ઓથોરિટી (રૂડા)ની મળેલી 181મી બોર્ડ બેઠકમાં બેડી અને પાળ-કાંગશિયાળી ટાઉન પ્લાનિંગ સ્કીમને મંજૂરી આપવા ઉપરાંત અન્ય મહત્ત્વના પ્રોજેક્ટને પણ મંજૂરીની મ્હોર લગાવવામાં આવી હતી.
આ બેઠકમાં `રૂડા’ના 302 કરોડના બજેટને પણ મંજૂરી આપવામાં આવી હતી. 2026-27ના વર્ષમાં 302 કરોડના ખર્ચમાં તંત્રને 343 કરોડની આવકનો અંદાજ છે. જ્યારે જે કામ મંજૂર કરવામાં આવ્યા તેમાં રિંગરોડ-2નો પાંચમો તબક્કો કે જેમાં મોરબી હાઈ-વે થી અમદાવાદ હાઈ-વે સુધીનો રસ્તો સમાવેશ છે તેને નવો બનાવવા માટે 186 કરોડનો ખર્ચ મંજૂર કરાયો હતો. આ રસ્તાની લંબાઈ 11 કિલોમીટર હોવાનું તંત્ર દ્વારા જણાવાયું હતું.
આ ઉપરાંત રૂડા વિસ્તારમાં આંતરિક રોડ નેટવર્કની કામગીરી માટે કૂવાડવા-સરધાર ડીપી રોડની કામગીરી માટે 15.50 કરોડ, તરઘડી ગામથી બાઘી ગામને જોડતો ડીપી રોડ બનાવવા માટે 7.80 કરોડનો ખર્ચ બહાલ રાખાયો હતો. આ જ રીતે રોણકી વિસ્તાર-ડ્રાફ્ટ ટીપી સ્કીમ નં.38/2માં રૂા.21.06 કરોડના ખર્ચે તેમજ 29.03 કરોડના ખર્ચે કાંગશિયાળી ગામમાં પાણી પૂરવઠાની યોજના હાથ ધરવામાં આવશે. જ્યારે બેડી અને પાળ-કાંગશિયાળી ટાઉન પ્લાનિંગ સ્કીમનો ઈરાદો પણ જાહેર કરાયો હતો.
