ટ્રમ્પના ભૂતપૂર્વ એટર્ની બરાબર ફસાયા
ન્યૂયોર્કના ભૂતપૂર્વ મેયર અને ડોનાલ્ડ ટ્રમ્પના પૂર્વ એટર્ની રૂડી ગુલિયાનીને વર્ષ 2020 માં ચૂંટણીની ફરજ બજાવતી જ્યોર્જિયાની માતા પુત્રીને બદનક્ષી, ખોટા આક્ષેપો તેમ જ માનસિક ત્રાસ આપવા બદલ 150 મિલિયન ડોલર એટલે કે 1,245.62 કરોડ રૂપિયા ચૂકવવાનો અદાલતે આદેશ કર્યો હતો.
2020 ની પ્રમુખ પદની ચૂંટણી દરમિયાન જ્યોર્જિયા માં ફરજ બજાવતી રુબી ફ્રી મેન અને તેની પુત્રી શૈય મોસ સામે રૂડી ગુલિયાની એ બેલેટ પેપર સાથે ચેડા કરવા સહિતની ગેરરીતિઓના આક્ષેપો કર્યા હતા. તેમણે કરેલા આક્ષેપો બાદ માતા પુત્રીની સલામતી પર જોખમ સર્જાયું હતું. ખુદ ટ્રમ્પે પણ આક્ષેપો દોહરાવ્યા હતા.બાદમાં બંને માતા પુત્રીએ આ આક્ષેપો ખોટા હોવાનું જણાવી રૂડી ગુલિયાની સામે વળતરનો દાવો માંડતો કેસ કર્યો હતો. સમગ્ર ઘટનાની પૂર્ણ તપાસ બાદ ગુલિયાની એ કરેલો એક પણ આક્ષેપ સાચો ન હોવાનું સાબિત થયું હતું.
કેસની સુનવણી પૂરી થયા બાદ જ્યુરીએ રૂડી ગુલિયાની ને દોષિત માન્યા હતા અને રૂબી ફ્રી મેનને બદનક્ષીના વળતર પેટે 1.61 કરોડ ડોલર અને માનસિક ત્રાસ બદલ 20 મિલિયન ડોલર તેમ જ શેય મોસને બદનક્ષીના વળતર પેટે 1.70 કરોડ ડોલર અને માનસિક ત્રાસના બદલામાં 20 મિલિયન ડોલર ચૂકવવાનો આદેશ કર્યો હતો. એ ઉપરાંત શિક્ષા તરીકે બંને વચ્ચે વધારાના 75 મિલિયન ડોલર ચૂકવવાનો પણ જ્યુરીએ આદેશ ફરમાવ્યો હતો. વળતરની આ કુલ રકમ 12456285000 રૂપિયા થાય છે.