હનુમાન મઢી પાસેના ગોડાઉનમાંથી સવા ત્રણ લાખના વાયર ચોરાયા

ગાંધીગ્રામ પોલીસ સ્ટેશન વિસ્તારમાં 72 કલાકમાં ત્રીજી ચોરી 

ભારતીનગર મેઇન રોડ પર એન્જિનિયર અને વિપ્ર યુવકના ઘરે તસ્કરોએ હાથફેરો કર્યા બાદ ગોડાઉનને નિશાન બનાવ્યું : ત્રણેય સ્થળે ચોરીને અંજામ આપનાર ગેંગ અલગ-અલગ કે એક ?

વોઇસ ઓફ ડે રાજકોટ

રાજકોટ શહેરમાં છેલ્લા ઘણા સમયથી ઘરફોડ ચોરીના બનાવો વધવા પામ્યા છે. ત્યારે ગાંધીગ્રામ પોલીસ સ્ટેશન વિસ્તારમાં છેલ્લા 72 કલાકમાં તસ્કરોએ ત્રણ સ્થળે ચોરીને અંજામ આપ્યો હતો. જેમાં ભારતીનગર મેઇન રોડ પર એન્જિનિયર અને વિપ્ર યુવકના ઘરે ચોરી કર્યા બાદ હનુમાન મઢી ચોકમાં આવેલા ગોડાઉનમાં ત્રાટક્યા હતા અને સવા લાખના વાયર ચોરી જતાં પોલીસ ગુનો નોંધી સીસીટીવી ફૂટેજ આધારે તપાસ હાથધરી છે.

બનાવની વધુ વિગતો અનુસાર, નિર્મળા રોડ પર લીંબુડી વાડી પાસે મિલન સોસાયટીમાં રહેતા વેપારી વિવેકભાઇ મણીલાલભાઇ દેથરીયા (ઉ.38) એ ફરીયાદમાં જણાવ્યું હતું કે, પોતે રૈયા રોડ હનુમાન મઢી પાસે ઓફીસ અને ગોડાઉન ધરાવે છે. તેમાં ઇલેકટ્રીકને લગતો સામાન રાખી વેપાર કરે છે.ગઇ તા.14ના રોજ આ ગોડાઉન બંધ કરી ઘરે જતા રહ્યા હતા ત્યારબાદ તા.15ના રોજ સવારે 10 વાગ્યે વેપારી પોતાની ઓફીસ અને ગોડાઉન ગયા ત્યારે ત્યાં સામાન વેરવીખેર હાલતમાં પડયો હતો.ત્યાં અંદર તપાસ કરતા પોલીકેબ કંપનીના અને બોનટોન કંપનીના અલગ અલગ દરનાં અનેક વાયરના બંડલો જોવા મળ્યા નહોતા. જેથી આ બનાવ અંગે ગાંધીગ્રામ પોલીસ મથકમાં પહોંચી રૂા.3.19 લાખના વાયર ચોરીની ફરીયાદ નોંધાવી હતી. આ મામલે તપાસ કરતા કોઇ તસ્કર દીવાલ કુદી ગોડાઉનમાં પ્રવેશ કરી દરવાજાના નકુચા તોડી ઇલેકટ્રીક વાયરના જથ્થાની ચોરી થયાનું જાણવા મળ્યું હતું.જ્યારે આ મામલે ગાંધીગ્રામ પોલીસને જાણ થતાં તેઓ દોડી આવ્યા હતા. અને આસપાસના સીસીટીવી ફૂટેજ તપાસી તસ્કરોનું પગેરું મેળવવા પ્રયાસ કર્યો હતો. જ્યારે સીસીટીવીમાં બે તસ્કરો રીક્ષામાં માલસામાન લઇ જતા દેખાયા હતા.અને તે રિક્ષા કાલાવડ રોડ તરફ જતી હોવાનું જણાયું હતું.

ઉલેખ્ખનિય છે કે, ગાંધીગ્રામ પોલીસ સ્ટેશન વિસ્તારમાં 72 કલાકમાં ત્રીજી ચોરી નો બનાવ બનતા લોકોમાં ફફડાટ મચી જવા પામ્યો છે. જેમાં તસ્કરોએ પ્રથમ ભારતીનગરમાં રહેતા વિપ્ર યુવકના ઘરે ત્રાટકી 42 હજારના ઘરેણાં ચોરી ગયા હતા બાદ ભારતીનગરમાં જ રહેતા એન્જિનિયર યુવકના ઘરને નિશાન બનાવી પોણા છ લાખના ઘરેણાંની ચોરી કરી હતી.બાદ સતત ત્રીજા દિવસે ચોરીને અંજામ આપતા તસ્કરો ગાંધીગ્રામ પોલીસને પડકાર ફેકી રહ્યાનું જણાય રહ્યું છે.