નાના મોવા મની પ્લસ શરાફી મંડળીના સંચાલકે ધ્રોલના ખેડૂતની 17 વીઘા જમીન પડાવી લીધી

ખેડૂતે ધંધાકીય જરૂરિયાત માટે 21 લાખ વ્યાજે લીધા તેની સામે 30 લાખ ચૂકવી દીધા : છતાં ખેડૂતની જમીનનો દસ્તાવેજ મોરબીની ભરવાડ મહિલાના નામે કરી નાખ્યો અને જમીન પર કબ્જો કરવા ધ્રોલના શખસને હવાલો આપ્યો : તાલુકા પોલીસે શરાફી મંડળીના સંચાલક સહિત પાંચ સામે ગુનો નોંધ્યો

રાજકોટની મની પ્લસ શરાફી મંડળીના અલ્પેશ દોંગા અને તેની ટોળકી સામે વધું એક ફરિયાદ નોંધવામાં આવી છે. ધ્રોલના વાંકીયા ગામના ખેડૂતે વ્યાજે લીધેલા રૂ.21 લાખના 30 લાખ ચૂકવ્યાં હતા. છતાં તેમની 17 વિઘા જમીનનો દસ્તાવેજ કરાવી તે દસ્તાવેજ મોરબીની ભરવાડ મહિલાના નામે કરી નાંખી, જમીન પર કબ્જો કરવાં ધ્રોલના હોટલ સંચાલક ભરવાડને હવાલો આપી ધમકીઓ અપાવી હતી.જે મામલે તાલુકા પોલીસે અલ્પેશ દોંગા સહિત પાંચ શખ્સો સામે છેતરપિંડી, મનીલેન્ડ એક્ટ સહિતની કલમ હેઠળ ગુનો નોંધ્યો છે.

માહિતી મુજબ ધ્રોલના વાંકીયા ગામે રહેતાં જયસુખભાઈ મોહનભાઈ ભીમાણી (ઉ.વ.46) એ નોંધાવેલ ફરીયાદમાં આરોપી તરીકે અલ્પેશ દોંગા, નૈમિશ રામાણી (રહે. બંને રાજકોટ), ભૂરો ભરવાડ (રહે. ધ્રોલ), નારાણ ભરવાડ અને પુરીબેન ભરવાડ (રહે. બંને મોરબી) નું નામ આપતાં જણાવ્યું હતું કે,વર્ષ 2022 માં તેમને ધંધાકીય કામ માટે પૈસાની જરૂરત હોય જેથી તા.15/07/2022 ના  રાજકોટ નાના મવા રોડ પર આવેલ મની પ્લસ શરાફી મંડળી ધરાવતા અલ્પેશ દોંગા પાસેથી રૂ.21 લાખ માસિક 2 ટકા વ્યાજે લીધા હતા. વ્યાજે આપેલ રકમની સામે સિક્યુરીટી પેટે જમીનનો પેન્ડીંગ દસ્તાવેજ કરી આપવાનું કહ્યું હતું.

અલ્પેશએ પ્રથમ રૂ.5 લાખ રોકડા આપ્યા હતા. અલ્પેશના કહેવાથી તા.27/03/2022ના વાંકીયા ગામની સ.નં. 119 ની ખેતીની જમીન હે.આ.ચોમી. 2-71-34 નો નૈમિશ રામાણીને સિક્યુરીટી પેટે પેન્ડીંગ દસ્તાવેજ કરી આપેલ હતો.  નૈમિષએ દસ્તાવેજમાં જણાવેલ રકમ રૂ.1.51 લાખનો ચેક આપેલ હતો.દસેક દિવસ બાદ અલ્પેશએ પોતાની ઓફીસે બોલાવી રૂ.9.49 લાખ રોકડા આપ્યા હતા.જે રકમ પર ત્રણેક મહિના સુધી માસિક 2 ટકા લેખે વ્યાજ ચૂકવ્યું હતું. બાદ તેઓને વ્યાજની રકમ ચુકવી શકતો ન હોય જેથી એકાદ વર્ષ બાદ  અલ્પેશએ પોતે વ્યાજે આપેલ રકમ વ્યાજ સહિત પરત આપવા કહેતા તા.16/10/2023 ના રોકડા રૂ.15 લાખ તથા ત્રણ દિવસ બાદ રોકડા રૂ.15 લાખ મળી કુલ રૂ.30 લાખ ચુકવી આપેલ હતા.આરોપી અલ્પેશ તથા નૈમિષએ ઊચું વ્યાજ વસૂલી જમીનનો દસ્તાવેજ પરત કરી આપવાની વાત કરતા રૂપિયાની માંગણી કરી હતી.

બાદમાં ધ્રોલ બસ સ્ટેન્ડ સામે ચા ની દુકાન ધરાવતા ભૂરાભાઈ ભરવાડ અવાર નવાર જમીન પર આવી મજૂરોને ધમકીઓ આપી હતી.અને આરોપીઓએ આ દસ્તાવેજ પુરીબેનના નામનો કરી નાખ્યો હતો.જેથી અલ્પેશ દોંગા તથા નૈમિષ રામાણીએ વધુ રૂપીયા પડાવવા તેઓનો માલીકી અને કબ્જા ભોગવટા વાળી જમીન પુરીબેન ભરવાડને વેંચી નાંખી તેઓ વતી ભુરા ભરવાડે જમીનનો કબ્જો ખાલી કરાવવા માટે હવાલો લઈ ધાક-ધમકી આપી તમામ આરોપીએ જમીન પચાવી પાડવાના ઇરાદે કાવતરૂ રચી જમીનનો દસ્તાવેજ કરી લીધો હતો.આ મમલે તાલુકા પોલીસે ગુનો નોંધી પીઆઈ ડી. એમ.હરિપરા અને ટીમે તપાસ હાથ ધરી હતી.