જુનિયરને ત્રણ કલાક સુધી ઉભો રખાયો, અંતે મોતને ભેટ્યો
પાટણની ધારપુર મેડીકલ કોલેજમાં MBBSમાં દાખલ થયેલા ધ્રાંગધ્રાના જેસડા ગામના યુવાન સાથે રેગીંગ
11 જુનિયર અને 16 સિનિયર વિદ્યાર્થીઓની પૂછપરછ
રેગીંગ પુરવાર થશે તો આકરાં પગલાની જાહેરાત
પાટણ-ઊંઝા રોડ પર આવેલી ધારપુર મેડિકલ કોલેજમાં એમબીબીએસનો અભ્યાસ કરતા એક સ્ટુડન્ટ અનિલ મેથાણીયાનું શંકાસ્પદ સ્થિતિમાં મોત થયું છે. આ વિદ્યાર્થીને સિનિયરો દ્વારા રેગિંગ કરવામાં આવ્યું હોવાનો આરોપ છે. એવું પણ જાણવા મળે છે કે કેટલાક સ્ટુડન્ટે તેને ત્રણ કલાક સુધી ઉભો રખાવીને પરેશાન કર્યો હતો જેના કારણે સ્ટુન્ડ ઢળી પડ્યો હતો.
પાટણથી છ કિલોમીટરના અંતરે આવેલી ધારપુર મેડિકલ કોલેજમાં એમબીબીએસના પ્રથમ વર્ષમાં સુરેન્દ્રનગર જિલ્લાના ધાંગધ્રા તાલુકાના જેસડા ગામનો 18 વર્ષીય અનિલ નટવરભાઈ મેથાણીયા અભ્યાસ કરતો હતો ચાલુ વર્ષે તેને એમબીબીએસ ના પ્રથમ વર્ષમાં પ્રવેશ મેળવ્યો હતો. ત્યારે ગતરોજ પ્રથમ વર્ષના વિદ્યાર્થીઓનું સિનિયર વિદ્યાર્થીઓ દ્વારા રેગિંગ કરાયું હતું. જેના કારણે 18 વર્ષીય યુવકનું મોત થયું હોવાનો પરિવારજનોએ આક્ષેપ કર્યો છે, પોસ્ટમોર્ટમ રિપોર્ટ આવ્યા બાદ કાર્યવાહી કરવામાં આવશે તેવું પણ પરિવારજનોએ જણાવ્યું હતું.
આ ઘટનાને લઈને મેડિકલ કોલેજના ડીન હાર્દિક શાહે જણાવ્યું હતું કે, ‘અન્ય વિદ્યાર્થીઓની પૂછપરછ કરતા જણાવા મળ્યું કે, સિનિયર વિદ્યાર્થીઓ બેથી ત્રણ કલાક સુધી મૃતક વિદ્યાર્થીને ઈન્ટ્રોડક્શન માટે ઊભો રાખતા આ ઘટના બની હતી.’
મેડિકલ કોલેજના ડીન હાર્દિક શાહે વધુમાં જણાવ્યું હતું કે, આ મામલે કોલેજની એન્ટી રેગિંગ કમિટીના સિનિયર ડોક્ટરો દ્વારા બંધ બારણે 11 જેટલા જુનિયર અને 16 જેટલા સિનિયર વિદ્યાર્થીઓની પૂછપરછ કરવામાં આવી રહી છે. પૂછપરછના અંતે રિપોર્ટ સબમિટ કરવામાં આવશે અને આ રિપોર્ટમાં યુવકનું મોત રેગિંગના કારણે થયું હોવાનો પુરવાર થશે તો સિનિયર વિદ્યાર્થીઓ સામે કડકમાં કડક કાર્યવાહી કરવામાં આવશે.
