પોલીસ માટે શર્મનાક: હોમગાર્ડ પર હુમલો કરનાર બેલડીએ કિન્નરની કારમાં કરી તોડફોડ

૧૮ દિ’ પહેલાં હોમગાર્ડના ગળે છરી મુકી ભાઈસા’બ બાપા કરાવ્યા તે જ રાત્રે ચાર મકાન-વાહનમાં તોડફોડ કર્યા બાદ હવે નવું કારસ્તાન
કિન્નર સાથે સામે જોવા બાબતે ઝઘડો કર્યા બાદ કારમાં તોડફોડ કરીને કહ્યું, અમે જ કાચ ફોડ્યા છે, થાય તે કરી લેજો

એક બાજુ રાજ્ય પોલીસવડા અધિકારીઓને આદેશ આપે છે કે ૧૦૦ કલાકની અંદર ગુંડાઓની યાદી તૈયાર કરી સબક શીખવો અને બીજી બાજુ ગુંડાઓને આ કાર્યવાહીનો કોઈ જ ખૌફ ન હોય તેવી રીતે ગુના આચરી રહ્યા છે. આવો જ એક ગુનેગાર બેલડી કે જેણે ૧૮ દિવસ પહેલાં હોમગાર્ડના ગળે છરી બુકી ભાઈસા’બ બાબા કરાવ્યા તો એ જ રાત્રે ચાર જેટલા મકાન અને વાહનમાં તોડફોડ કર્યા બાદ બન્નેને પોલીસે પકડી લીધા હતા. જો કે આ બન્ને જેવા છૂટ્યા કે સુધરવાની જગ્યાએ વધુ એક ગુનાને અંજામ આપી કિન્નરની ગાડીમાં તોડફોડ તેમજ જાનથી મારી નાખવાની ધમકી આપ્યાનું પોલીસ ચોપડે નોંધાયું છે.

આ અંગે નિકિતા દે ગુરુ મીરા દે (ઉ.વ.૨૭)એ ગાંધીગ્રામ પોલીસ મથકમાં નોંધાવેલી ફરિયાદમાં જણાવ્યું કે જીજે૩પીડી-૪૧૨૧ નંબરની સ્કોર્પિયો કે જે ૧ જાન્યુઆરીએ લીધી હતી તે એકતા સોસાયટી-પરાપીપળિયા ખાતે ઘરની બહાર જ પાર્કિંગ કરવામાં આવી હતી. દરમિયાન સોસાયટીમાં લગ્ન હોય મોહિત ચમનભાઈ ગોહિલ અને અમિત વિજયભાઈ ખુમાણ આ પ્રસંગમાં આવ્યા હતા એ સમયે સામે જોવા બાબતે ચડભડ થતાં મોહિત-અમિતે કહ્યું હતું કે તમે અમને ઓળખતા નથી, સમય આવે એટલે ઓળખી લેશો.
દરમિયાન ૨૩ ફેબ્રુઆરીએ જૂનાગઢ દર્શન કરવા જવાનું હોય સ્કોર્પિયો પરતી કવર હટાવતાં બારીના કાચ ફૂટેલા જોવા મળ્યા હતા. ત્યારપછી સીસીટીવી ચેક કરતાં ૨૪ ફેબ્રુઆરીએ સવારે ૫:૪૩ વાગ્યે બે શખ્સો કાચ ફોડતાં અને મોબાઈલમાં વીડિયો કોલમાં વાત કરતા જોવા મળ્યા હતા. વળી વીડિયો કોલમાં વાત કરતો એક શખ્સ `આ જ ગાડી છે, ઘા કરુ છું’ તેવું સાંભળવા મળ્યું હતું.

ત્યારબાદ એ જ દિવસે બપોરે ૧૨ વાગ્યે ભગવતીપરા પુલ નીચે ગીરીરાજ પાર્ટી પ્લોટ જવાના રસ્તેથી ફરિયાદી પસાર થઈ રહ્યા હતા ત્યારે મોહિત અને અમિત સામે મળતાં તેમને પૂછયું હતું કે તમે જ અમારી ગાડીના કાચ ફોડ્યા છે ? આ સાંભળી બન્નેએ કહ્યું કે અમે જ કાચ ફોડ્યા છે અને તમારાથી થાય તે કરી લેશો. જો હવે ફરીથી સામે મળશો તો જાનથી મારી નાખશું તેવી ધમકી પણ આપી હતી.