ગાંજાનું નેટવર્ક ભેદવાની જવાબદારી ક્રાઈમ બ્રાન્ચને

જંગલેશ્વરમાંથી પકડાયેલા ૫૧ કિલો ગાંજાની તપાસ ભક્તિનગર પોલીસ પાસેથી ખૂંચવી DCBને સોંપાઈ
ગાંજો સપ્લાય કરનાર ગોંડલના શખ્સ તેમજ જેના દોરીસંચારથી આ ધંધો ચાલી રહ્યો’તો તે જાવેદ જૂણેજા પોલીસ પકડથી દૂર
અચાનક જ તપાસ આંચકી લેવાતા પોલીસ બેડામાં તરેહ તરેહની ચર્ચાઓ

સ્પેશ્યલ ઓપરેશન ગ્રુપ (એસઓજી) દ્વારા ગત રવિવારે જંગલેશ્વરમાં હુસેની ડેરીવાળી શેરીમાં આવેલી ઓરડીમાંથી ૫૧૮૬૦ કિલોગ્રામ ગાંજા સાથે બે શખ્સોની ધરપકડ કરી હતી. એકંદરે અહીંથી ગાંજા સપ્લાયનું મોટું નેટવર્ક ચાલી રહ્યું હોવાનો પર્દાફાશ પણ થયો હતો. એસઓજીએ એકદમ સંયમપૂર્વક આ ઓપરેશન પાર પાડ્યા બાદ ગાંજાના મસમોટા જથ્થો તેમજ બે આરોપીની સોંપણી ભક્તિનગર પોલીસને કરી હતી. ભક્તિનગર પોલીસ દ્વારા આરોપીને ૧૦ દિવસના રિમાન્ડ અર્થે કોર્ટમાં પણ રજૂ કરાયા હતા જે માંગ ફગાવી દેવાઈ હતી. દરમિયાન આ ગાંજાકાંડની તપાસમાં એક નવો જ વળાંક આવ્યો છે અને હવે આગળની તમામ તપાસ ડીસીબી મતલબ કે ડિટેક્શન ક્રાઈમ બ્રાન્ચને સોંપવામાં આવી હોવાનું જાણવા મળી રહ્યું છે.

એસઓજી દ્વારા ગાંજા સાથે રફીક યુસુફભાઈ જુણેજા અને અસ્લમ ગુડ્ડુભાઈ સૈયદ નામના બે શખ્સોની ધરપકડ કરી હતી. આ બન્નેએ જાવેદ જુણેજા કે જે જંગલેશ્વરની નામચીન મહિલા રમાનો પૂર્વ પતિ હોય તેના દોરીસંચારથી આ ધંધો કરી રહ્યા હોવાની કબૂલાત આપતાં પોલીસે તેનું નામ પણ ખોલ્યું હતું. બીજી બાજુ ગાંજાનો આ જથ્થો ગોંડલનો શખ્સ આપી ગયો હોવાની કબૂલાત આપતાં પોલીસે તેની પણ શોધખોળ શરૂ કરી હતી.

ગાંજા સપ્લાયનું નેટવર્ક ભેદવા માટે ભક્તિનગર પોલીસ દ્વારા અસલમ અને રફીકને રિમાન્ડ અર્થે કોર્ટમાં રજૂ કરાયા હતા જે નામંજૂર કરવામાં આવ્યા હતા. બીજી બાજુ ગોંડલના શખ્સ તેમજ જાવેદ જુણેજાને પકડવા માટે પોલીસ દ્વારા દરોડાનો દોર આરંભી દેવામાં આવ્યો હતો ત્યારે જ પોલીસ કમિશનર દ્વારા આ દરોડાની સમગ્ર તપાસ ભક્તિનગર પોલીસ પાસેથી ખુંચવી લઈને ડીસીબીને સોંપી દેવામાં આવતા હવે ડીસીબી દ્વારા આરોપીઓને પકડવા તેમજ ગાંજા વેચાણની સિન્ડીકેટમાં કોણ કોણ સામેલ છે તે સહિતની તપાસ કરવામાં આવશે.

દરમિયાન આ અંગે ડીસીબી પીઆઈ એમ.આર.ગોંડલિયાનો સંપર્ક સાધવામાં આવતાં તેમણે કહ્યું હતું કે હજુ સુધી ભક્તિનગર પોલીસ પાસેથી તપાસ લઈને ડીસીબીને સોંપવાનો હુકમ તેમને કરવામાં આવ્યો નથી. જો કે સત્તાવાર વર્તુળોએ આ ગાંજા રેડની તપાસ ડીસીબીને સોંપી દેવામાં આવી હોવાનું ભારપૂર્વક જણાવ્યું હતું.

અચાનક જ ભક્તિનગર પોલીસ પાસેથી તપાસ શા માટે આંચકી લેવામાં આવી છે તેને લઈને પોલીસ બેડામાં તરેહ તરેહની ચર્ચાઓનો દોર પણ શરૂ થઈ જવા પામ્યો છે.