રાજકોટમાં લૂંટારુ ટોળકીનો આતંક : બે કલાકમાં ત્રણ યુવકોને છરી ઝીંકી લૂંટયા

ભગવતીપરા રેલ્વે ફાટક પાસે રાત્રિના 9 વાગ્યે ફાકીના પૈસા માંગી યુવકની હત્યાનો પ્રયાસ કર્યો : 10:30 વાગ્યે જુના માર્કેટિંગ યાર્ડ પાસે પાણીપુરીના ધંધાર્થીને છરીના ઘા ઝીંકી રોકડ અને મોબાઈલની લૂંટ ચલાવી : 11 વાગ્યે ગોંડલ રોડ માલધારી સોસાયટીનાં ખુણે યુવાનને છરી બતાવી રોકડ રૂ.10 હજાર અને મોબાઈલ લૂંટી લીધો : એક શખ્સની પોલીસએ કરી અટકાયત

રાજકોટમાં લુખ્ખાઓ અને આવારા તત્વો બેફામ બન્યાં હોય તેમ ગુનાખોરીનો ગ્રાફ સતત ટોચ પર જઈ રહ્યો છે.ત્યારે રવિવાર રાત્રિના ચાર લૂંટારુ શખસોએ રાજકોટમાં આતંક મચાવ્યો હતો.અને માત્ર બે કલાકના અંતરમાં ત્રણ સ્થળે લૂંટને અંજામ આપીને ત્રણ યુવકને છરીના ઘા ઝીંક્યા હતા.અને આ મામલે પોલીસ દ્વારા એક શખ્સની અટકાયત કરવામાં આવી છે.

મળતી વિગત મુજબ  ભગવતીપરા શેરી નં.1 માં રેલ્વે ફાટક પાસે રહેતો હાર્દીક ઉર્ફે હિતેશ નટુભાઇ ચૌહાણ(ઉ.વ.24) રવિવાર રાત્રિના 9 વાગ્યાની આસપાસ તેઓ ઘર પાસેના પાનના ગલ્લાની નજીક હતા ત્યારે તેણી પાસે ત્રણ અજાણ્યા શખ્સો ઘસી આવ્યા હતા.અને યુવક પાસેથી ફાકીની માંગણી કરી હતી.જેથી યુવકે આપવાની ના પડતાં લુટારુ ટોળકી ઉશ્કેરાઈ હતી.અને યુવકને રેલવે પાટા પાસે લઇ જઈને છરીના ઘા ઝીંકી તેના આંતરડા બહાર કાઢી નાખ્યા હતા.ઘટનાની જાણ યુવકના પરિવારજનોને થતાં તેઓ તાત્કાલિક દોડી આવ્યા હતા.અને તેને સારવાર અર્થે ખસેડ્યો હતો.અને આ મામલે બી ડિવિઝન પોલીસ દ્વારા હત્યાની કોશિશનો ગુનો નોંધવામાં આવ્યો હતો.

આ ઘટનાને અંજામ આપીને લુટારુ ટોળકી 10.30 વાગ્યા આસપાસ જુના માર્કેટિંગ યાર્ડ પાસે પહોંચી હતી.અને આ મામલે પોલીસ ફરિયાદ કરનાર દિપકભાઈ અમરસિંગ નિસાદ (ઉ.વ.24) એ નોંધાવેલ ફરીયાદમાં આરોપી તરીકે શની ઉર્ફે ચાડીયો કલુ ઉધરેજીયા (રહે. ભગવતીપરા, આશાપીરની દરગાહ પાસે) નું નામ આપતાં જણાવ્યું હતું કે,તેઓ પાણીપુરીની લારી ચલાવી વેપાર કરે છે. શનિવારે પોતાની લારી જયુબેલી માર્કેટ ખાતે લગાવેલી અને રાત્રીનાં સાડા દશેક વાગ્યાનાં આસપાસ પાણીપુરીની લારી લઇ ઘરે જતો હતો તે સમયે કરણાભાઇનાં ગાર્ડન રેસ્ટોરન્ટની બાજુની સરકારી સ્કુલ તરફની શેરી આગળ પહોચેલ તે સમયે ત્રણ શખ્સો ઘસી આવેલ તે પૈકી એક શખ્સે કહેલ કે મને પાણીપુરી ખવડાવ તે વખતે તેને કહેલ કે મારી પાસે પાણીપુરી નથી.જેથી એક શખ્સે પાછળથી આવી ગળા પાસે છરી મુકી કહેલ કે તારી પાસે જે પૈસા હોય તે કાઢીને આપી દે તેમ કહેતા યુવકે આખા દિવસની કમાણીનાં ભેગા થયેલ રૂ.1500 આપી દિધેલ તે વખતે ત્રીજા શખ્સે તેને હાથની હથેળીમાં છરીનો ઘા કરી દિધેલ હતો. તેમજ એક અન્ય શખ્સે પેન્ટનાં ખીસ્સામાંથી મોબાઇલ ફોન ઝુંટવી લીધો હતો.

ત્યાર બાદ આ ત્રિપુટી સાથે વધુ એક શખ્સ જોડાયો હતો.અને તેઓએ 11 વાગ્યા આસપાસ માલધારી સોસાયટીનાં ખુણે હિતેષભાઇ પ્રભાતભાઇ ડાંગર નામના યુવકને છરી બતાવીને રૂ.10 હજાર અને મોબાઈલની લૂંટ ચલાવી હતી.ભોગ બનનાર હિતેષભાઇએ બુમાબુમ કરતા સામેની બાજુએ ઉભેલ લોકો પૈકી કેટલાક છોકરાઓ ચારેય શખ્સોને પકડવા માટે દોડયા અને એક શખ્સને પકડી પાડેલ જેને પકડવા જતા તે શખ્સે છરીથી હુમલો કરતાં અમીતભાઇ ખોયાણી નામના યુવકને ઇજા પહોંચતા સારવાર માટે ખસેડવામાં આવ્યો હતો.અને પકડી પાડવામાં આવેલા સની ઉર્ફે ચડીયો કલુ ઉધરેજીયાને પોલીસ હવાલે કરવામાં આવ્યો હતો.અને તેની પ્રાથમિક પૂછતાંછમાં બાકીના ત્રણ શખ્સો ગ્રીનલેન્ડ ચોકડી તરફ ભાગી ગયાનું જાણવા મળતા તેણી શોધખોળ કરી હતી.જેથી માત્ર બે કલાકના અંતરમાં ચાર શખસોએ લૂંટ ચલાવીને ત્રણ યુવકોને છરીના ઘા ઝીંક્યા હતા.