દુષ્કર્મના ગુનામાં આરોપી રોહિત ચૌહાણને આજીવન કેદ

૧૭ વર્ષની સગીરાને અપહરણ કરી ૧ મહિનો ગોંધી રાખી ‘તી

શહેરમાં રહેતી ૧૭ વર્ષની સગીરાને લલચાવી ફોસલાવી અપહરણ કરી દુષ્કર્મ આચરવાના ગુનામાં આરોપી રોહિત ચૌહાણને અદાલતે આજીવન કેદની સજા અને રૂ.૨૦ હજારનો દંડ ફટકારતો હુકમ કર્યો છે.

આ કેસની હકીકત મુજબ રાજકોટમાં નટરાજ નગર વિસ્તારમાં રહેતા આરોપી રોહિત ભાવેશભાઈ ઉર્ફે ભાવસિંગભાઈ ભીખાભાઈ ચૌહાણ નામના શખ્સે જામનગર રોડ ઉપર રહેતી ૧૭ વર્ષની સગીરાને લલચાવી ફોસલાવી પ્રેમ જાળમાં ફસાવી હતી અને બાદમાં સગીરાને અમદાવાદ, ભાવનગર, સુરત, વડોદરા અને દામનગર સહિતની જગ્યાએ લઈ જઈ શરીર સંબંધ બાંધ્યો હતા.ભોગ બનનાર સગીરાના પિતાએ પોલીસ ચોપડે અપહરણની ફરિયાદ નોંધાવી હતી પોલીસે ફરિયાદના આધારે એક માસ બાદ આરોપી રોહીત ચૌહાણને ભોગ બનનાર સગીરા સાથે ઝડપી લીધો હતો અને સગીરાએ આપવીતી વર્ણવતા આરોપી રોહિત ચૌહાણ વિરુદ્ધ પોકસો એક્ટની કલમનો ઉમેરો કરવામાં આવ્યો હતો જે કેસમાં આરોપી સામે પૂરતો પુરાવો મળતા તપાસ અધિકારી દ્વારા કોર્ટમાં ચાર્જશીટ રજૂ કરવામાં આવ્યું હતું. ચાર્જશીટ બાદ કેસ અદાલતમાં ચાલવા ઉપર આવતા ભોગ બનનાર, ફરિયાદી, તપાસ અધિકારી, ડોક્ટર અને જન્મ મરણ વિભાગના અધિકારી સહિતનાની જુબાની અને સરકારી વકીલ મહેશભાઈ જોષીએ આશરે ૧૫ જેટલા મહત્વના દસ્તાવેજી પુરાવો રજુ કરી કરેલી ધારદાર દલીલો તેમજ રાખેલા ઉચ્ચ અદાલતના ચુકાદાઓને ધ્યાને લઈ પોકસો કોર્ટના ન્યાયાધીશ બી.બી. જાદવે આરોપીને આરોપી રોહિત ચૌહાણને તકસીરવાન ઠેરવી આજીવન કેદની સજા અને રૂ.૨૦ હજારનો દંડ ફટકાર્યો હતો તેમજ દંડની રકમમાંથી ૫૦ ટકા રકમ ભોગ બનનાર સગીરાને વળતર પેટે ચૂકવવા તેમજ જીવીસીએસ ૨૦૧૯ મુજબ ભોગ બનનારને રૂ.૩ લાખ ચૂકવવા હુકમ કર્યો છે. આ કેસમાં સરકાર પક્ષે સરકારી વકીલ મહેશભાઈ જોષી રોકાયા હતા