લગ્ન માટે દોઢ લાખની જરૂર પડતાં એક બાદ એક ૧૮ બાઈક ચોર્યા !

કયું બાઈક ચોરી કરવાનો છે તેના ફોટા સાગરિતોને મોકલતો, બાઈક પસંદ પડે એટલે ચોરી કરીને પાંચ-સાત હજારમાં વેચી નાખતો
એક બાઈક ઉભું રાખ્યું’ને પોલીસના હાથે લાગ્યું વાહન ચોરીનું મસમોટું રેકેટ: ત્રણ તસ્કરને ૧૮ બાઈક સાથે પકડી લેવાયા

રાજકોટ સહિત આખા ગુજરાતમાં છેલ્લા ઘણા સમયથી વાહનચોરીના બનાવોમાં ચિંતાજનક ઉછાળો નોંધાયો છે. ખાસ કરીને કોઈ વાહન ચોરી થયા બાદ પોલીસ દ્વારા મહેનત કરીને તેને શોધી આપવામાં આવે ત્યારે તે વાહનની હાલત હાડપિંજર જેવી થઈ ગઈ હોય છે મતલબ કે ચોરી કરનાર તસ્કર તે બાઈકના સ્પેરપાર્ટસ અથવા તો આખું બાઈક પાણીના ભાવે વેચી નાખતો હોય છે. આવું જ એક મોટું રેકેટ ચાલી રહ્યું હતું પરંતુ પોલીસ તેને ભેદવામાં નિષ્ફળ નિવડી રહી હતી. જો કે ગુનેગાર કોઈ પણ હોય તે પોલીસથી બચી શકતો નથી તે વાક્યની માફક પોલીસે એક મસમોટું રેકેટ પકડી પાડ્યું હતું.

અમદાવાદ જે-ડિવિઝન એસીપી પ્રદીપસિંહ જાડેજાના માર્ગદર્શન હેઠળ ઈસપનુર પોલીસ મથકના પીઆઈ બી.એસ.જાડેજા, પીએસઆઈ આર.બી.તેલે સહિતની ટીમ અમદાવાદમાં વાહન ચેકિંગ કરી રહી હતી ત્યારે સૂર્યનગર પોલીસ ચોકી પાસેથી શંકાસ્પદ શખ્સ જીજે૭સીએસ-૮૯૮૭ નંબરનું બાઈક લઈને નીકળ્યો હોય તેને ઉભો રાખી પૂછપરછ કરાતા તેણે પોતાનું નામ વિકાસ મુન્નાભાઈ પાંડે (ઉ.વ.૨૫) આપ્યું હતું. ત્યારબાદ પોલીસે આ બાઈક નંબરના આધારે તેના માલિકનો સંપર્ક સાધતાં તેણે કહ્યું હતું કે આ બાઈક ચોરાઈ ગયાની તેમણે ફરિયાદ પણ નોંધાવી હતી !

આ પછી પોલીસે વિકાસ મુન્નાભાઈ પાંડેની ધરપકડ કરી આગવી ઢબે પૂછપરછ કરતાં તેણે પોપટ બનીને વટાણા વેરતાં કહ્યું હતું કે તેણે આ એક નહીં બલ્કે પોતાના સાગ્રીતો સાથે મળીને ૧૮ જેટલી બાઈક ચોરીને અંજામ આપ્યો છે. તેની સાથે વાહનચોરીમાં ભાસ્કર ઉર્ફે સોનુ આધ્યાશંકર પાંડે (ઉ.વ.૨૮, રહે.અમદાવાદ), સાગર નાથાભાઈ સોલંકી (ઉ.વ.૨૩, રહે.અમદાવાદ) અને સંજય ભુરાભાઈ મીયાત્રા (ઉ.વ.૨૯ રહે. મોરબી, હાલ ચોટીલા) પણ સામેલ હોવાની કબૂલાત આપતાં પોલીસે તે તમામની ધરપકડ કરી ૧૮ બાઈક કબજે કર્યા હતા.

વધુમાં એવો પણ ખુલાસો થયો હતો કે વિકાસ પાંડે જે વાહનને લોક ન કર્યા હોય તેને જ ટાર્ગેટ કરતો હતો. જો કે વાહન ચોરી કરતા પહેલાં તેનો ફોટો પાડીને સાગ્રીતોને મોકલી દેતો હતો અને પછી જેવી મંજૂરી મળે એટલે ચોરી કરીને પાંચ-સાત હજારમાં વેચી નાખતો હતો. વિકાસ પાંડેની ઉત્તરપ્રદેશમાં સગાઈ થઈ હોય હવે લગ્નનું ટાણું આવી ગયું હોવાથી તેના માટે દોઢ લાખ રૂપિયાની જરૂર પડતાં તેના ખર્ચને પહોંચી વળવા માટે છથી સાત મહિનામાં જ ૧૮ વાહન ચોર્યા હતા.