સોશ્યલ મીડિયા મારફત સગીરાને ફસાવી હવસનો શિકાર બનાવનાર નરાધમની ધરપડક

જસદણના ભડલી ગામની સગીરાને થોરીયાળીના શખ્સે લગ્નની લાલચ આપી દુષ્કર્મ ગુજાર્યું હતું

જસદણના ભડલી ગામે રહેતી સગીરાને થોરીયાળીના શખ્સે સોશિયલ મીડિયા મારફત પરિચય મેળવી પ્રેમજાળમાં ફસાવી લગ્નની લાલચ આપી દુષ્કર્મ ગુજારતા જસદણ પોલીસે ગુનો નોંધી નરાધમની ધરપકડ કરી છે.

આ અંગે વિગત મુજબ, 17 વર્ષની સગીરાના પિતાએ જસદણ પોલીસમાં નોંધાવેલી ફરિયાદમાં આરોપીમાં થોરીયાળીના મેહુલ ભાણજી ઝાપડીયા(ઉ.વ.19)નું નામ આપ્યું હતું જેમાં તેને જણાવ્યું હતું કે, તેની પુત્રી 17 વર્ષીય છે. અને ધો.8 સુધી ભણેલી છે. જે પછી તેણે સ્કૂલ છોડી દીધી હતી અને ઘરકામ કરતી હતી.આરોપી મેહુલના સગા સગીરાના ગામમાં જ રહેતા હોય, કોઈ લગ્નપ્રસંગ પર આરોપી સગાના ઘરે ગયેલો અને સગીરા ઉપર તેની નજર પડી હતી.

ત્યારે નામ વગેરે પૂછી સોશ્યલ મીડિયા પર ઇન્સ્ટાગ્રામ સહિતની એપ મારફતે સંપર્ક કરી વાત ચિત કરતો હતો.અને સંપર્ક થયાના ત્રણેક મહિના બાદ તા.15 જાન્યુઆરીના રોજ યુવક અડધી રાતે સગીરાના ગામ પહોંચ્યો અને મેસેજ ફોન કરી સગીરાને ઘર બહાર મળવા બોલાવી હતી બાદ રાત્રીના અંધારાનો લાભ લઇ બળજબરીથી સગીરા સાથે શરીર સંબંધ બાંધ્યો હતો. સગીરાએ આ અંગે પરિવારને આપવીતી જણાવતા અંતે ગુનો દાખલ કરાયો હતો.જેથી આ મામલે જસદણ પોલીસ દ્વારા મેહુલ ભાણજી ઝાપડીયા સામે ગુનો નોંધી તેની ધરપકડ કરી છે.