જીયાણા ગામે માતા-પુત્રના ખોટા ડોક્યુમેન્ટ બનાવી જમીન બીજાના નામે કરી નાખવાનું કૌભાંડ

પુત્ર સગીર વયનો થતાં મહિલા વારસાઈ જમીનમાં તેનું નામ ચડાવવા જતાં પ્રકરણ બહાર આવ્યું : એરપોર્ટ પોલીસે ગુનો નોંધ્યો

રાજકોટમાં મવડી ચોકડી પાસે રહેતા માતા-પુત્રના નકલી આધાર કાર્ડ અને પાનકાર્ડ બનાવી જીયાણા ગામે આવેલી તેમની વારસાઈ જમીન અન્યના નામે કરી નાખતા મહિલાએ એરપોર્ટ પોલીસમાં ફરિયાદ નોંધાવી છે.

વધુ માહિતી મુજબ મવડી ચોકડી પાસે મૌલિક પાર્કમાં રહેતા વિલાસબેન પાનસુરિયાએ નોંધાવેલી ફરિયાદમાં જણાવ્યું હતું કે, જીયાણા ગામે રહેતા મનસુખભાઇ સાથે તેમના વર્ષ 2000માં લગ્ન થયા હતા.અને તેમનાથી એક પુત્રની પ્રાપ્તિ થઈ હતી.વર્ષ 2008માં મનસુખભાઇનું અવસાન થતાં તેમના પિતા દ્વારા આપવામાં આવેલી વરસાઈ જમીન વિલાસબેન અને તેમના પુત્ર ભૌતિકના નામે થવાની હતી.પરંતુ પુત્ર  ભૌતિકની ઉંમર 18 વર્ષની થાય ત્યારે જમીનમાં નામ ચડાવવામાં આવે તેવું પરિવારે નક્કી કર્યું હતું.પુત્રની ઉંમર 18 વર્ષ થતાં તેઓ તેનું નામ જમીનમાં ચડાવવા ગયા ત્યારે માલૂમ પડ્યું હતું કે,અગાઉથી કોઈ અજાણ્યા વ્યક્તિઓ દ્વારા વિલાસબેન અને તેમના પુત્ર ભૌતિકના નકલી આધારકાર્ડ અને પાનકાર્ડનો ઉપયોગ કરી જમીન અન્ય વ્યક્તિઓના નામે કરી દેવામાં આવી છે.જે વ્યક્તિઓને તેઓ ઓળખતા પણ નથી.જેથી આ મામલે વિલાસબેને પોલીસ કમિશનરને અરજી કરતાં પોલીસે તપાસ કર્યા બાદ એરપોર્ટ પોલીસના પીઆઇ જે.એસ.ગામીત દ્વારા ગુનો નોંધી કાર્યવાહી કરવામાં આવી છે.