સાડા ત્રણ વર્ષની અનાથ બાળકી પર સામૂહિક દુષ્કર્મ

શાપર-વેરાવળની ઘટના: ફુલ જેવી બાળકી પર બે હેવાનોનું શૈતાની કૃત્ય: દાદી મજૂરીએ ગયા બાદ બાળકી પિતરાઈ સાથે રમતી હતી ત્યારે નાસ્તાની લાલચ આપી કુકર્મ આચર્યુ: પોલીસમાં દોડધામ

થોડા સમય પહેલાં આજી ડેમ પોલીસ મથક વિસ્તારમાં નાની બાળકી પર હેવાને દુષ્કર્મ આચરી તેને મોતને ઘાટ ઉતારી દીધા બાદ ભક્તિનગર રેલવે સ્ટેશન પ્લોટ નજીકથી નાની બાળકી ઉપર ચાર શૈતાનોએ કુકર્મ આચરીને મારી નાખ્યાની ઘટના હજુ તાજી જ છે ત્યારે આવો જ વધુ એક બનાવ શાપર-વેરાવળમાં બનતાં અરેરાટી વ્યાપી જવા પામી છે. અહીંના સરદાર ચોક મફતિયાપરામાં રહેતી સાડા ત્રણ વર્ષની અનાથ બાળકી ઉપર બે હેવાનોએ સામૂહિક દુષ્કર્મ ગુજારતાં બાળકીને ગંભીર હાલતમાં હોસ્પિટલમાં ખસેડવામાં આવી છે. બીજી બાજુ ઘટનાની જાણ થતાં જ શાપર-વેરાવળ પોલીસે આરોપીઓને પકડવા દોડધામ શરૂ કરી છે.

આ ઘટનાની જાણવા મળતી વિગતો પ્રમાણે શાપર વેરાવળના સરદાર ચોકમાં આવેલા મફતિયાપરામાં રહેતી સાડા ત્રણ વર્ષની બાળકી તેના દાદીમા સાથે રહે છે. બાળકીના માતા-પિતા ચારેક વર્ષ પહેલાં મૃત્યુ પામ્યા હોવાથી તે દાદી સાથે જ રહેતી હતી. દરમિયાન દાદી ૧૬ માર્ચે મજૂરીએ ગયા હોવાથી બપોરે બારેક વાગ્યાના અરસામાં બાળકી તેના પિતરાઈ તેમજ અન્ય એક બાળક સાથે રમતી હતી. રમતાં-રમતાં ત્રણેય બાળકો ટી.વી.જોવા બેઠા હતા. આ વેળાએ બાળકી પાણી પીવા બહાર આવતા બે વાસનાંધ વરુઓ ત્યાં આવી પહોંચ્યા હતા અને બાળકીને નાસ્તાની લાલચ આપીને બહાર લઈ ગયા હતા.

મોડે સુધી બાળકી ન મળતાં પિતરાઈએ બાળકીના દાદીને જાણ કરતા તેઓ હાંફળા ફાંફળા દોડી આવ્યા હતા અને બાળકીની શોધખોળ શરૂ કરી હતી. આ પછી કોઈ જાગૃત નાગરિકની મદદથી વિસ્તારમાં લાગેલા સીસીટીવી ચેક કરતાં તેમાં બાળકી બે શખ્સો સાથે જઈ રહેલી જોવા મળી હતી. આ પછી પોલીસને જાણ કરતાં પોલીસે ઘટનાની ગંભીરતાને ધ્યાને લઈ બાળકીની શોધખોળ શરૂ કરી હતી. દરમિયાન રવિવારે બપોરના સમયે કોઈ જાગૃત નાગરિક શાપર-વેરાવળ હાઈવે પર સર્વિસ રોડ પરથી પસાર થઈ રહ્યો હોય તેના ધ્યાન પર આ બાળકી આવી જતાં તેણે સૌથી પહેલાં બાળકીને આરોગ્ય કેન્દ્ર ખાતે લઈ જવામાં આવી હતી. જ્યાં બાળકીની તબિયત વધુ બગડતાં તેને ઝનાના હોસ્પિટલે ખસેડવામાં આવી હતી. ફૂટેજમાં જોવા મળ્યા પ્રમાણે એક મોટી ઉંમરનો વ્યક્તિ તેમજ તેની સાથે એક યુવાન વ્યક્તિ બાળકીને લઈ જતાં દેખાઈ રહ્યા છે.

બાળકી આઈસીયુમાં દાખલ: હેવાનોએ મોઢું વિકૃત કરી નાખ્યું !
દુષ્કર્મનો ભોગ બનેલી બાળકીને ઝનાના હોસ્પિટલમાં લાવવામાં આવતાં તેની તબિયત બગડતી જતી હોવાને કારણે તેને આઈસીયુમાં દાખલ કરવામાં આવી હતી. પ્રાથમિક રીતે જાણવા મળ્યા પ્રમાણે હેવાનોએ પોતાની વાસના સંતોષ્યા બાદ બાળકીના મોઢા ઉપર હુમલો કર્યો હતો જેના કારણે તેનું આખું મોઢું વિકૃત થઈ જવા પામ્યું હતું.

મારા પર ચપ્પુથી હુમલો કરાયો: બાળકી
દરમિયાન બાળકી સાથે વાતચીત કરવાનો પ્રયાસ કરાતાં તેણે કાલીઘેલી ભાષામાં જણાવ્યું હતું કે તેના મોઢા ઉપર ચપ્પુ (એક પ્રકારનું ચાકું)થી હુમલો કરવામાં આવ્યો છે. જો કે બાળકી આગળ કશું બોલે તે પહેલાં રડવા લાગતાં ત્યાં હાજર સૌ કોઈ ગમગીન બની ગયા હતા.

આરોપીઓ પોલીસના હાથવેંતમાં
શાપર-વેરાવળ પોલીસે અનાથ બાળકી પર દુષ્કર્મ ગુજારનારા હેવાનો સામે પોક્સો સહિતની કલમો હેઠળ ગુનો નોંધી તેની શોધખોળ શરૂ કરી હતી અને બન્ને આરોપીઓ પોલીસના હાથવેંતમાં હોવાનું જાણવા મળી રહ્યું છે.