ક્રાઈમ બ્રાન્ચે ત્રણ દિ’ વાસણ-નાળિયેર વેચી હત્યારાને પકડ્યો

DCBની ટીમનું તમીલનાડુંના તીરૂનેલવેલીમાં ઓપરેશન: ૨૦૧૪માં ગોકુલધામના સમ્રાટ ઈન્ડ. એરિયામાં નેપાળી યુવકની પૈસાની લેતીદેતીમાં થઈ’તી હત્યા
હત્યા કર્યા બાદ હત્યારો ઉત્તરાખંડ અને ત્યાંથી તમીલનાડુંમાં છૂપાઈ ડ્રાઈવિંગ સહિતનું કામ કરી રહ્યો’તો

રાજકોટ ક્રાઈમ બ્રાન્ચ એક બાદ એક રીઢા ગુનેગારોને દબોચી રહી છે સાથે સાથે ગુનો આચરીને દસ અથવા તેનાથી વધુ સમય સુધી ફરાર રહેલા આરોપીઓને પકડવામાં આવી રહ્યા છે ત્યારે તેમાં વધુ એકનો ઉમેરો થયો છે. આજથી ૧૧ વર્ષ પહેલાં તા.૫-૩-૨૦૧૪ના માલવિયાનગર પોલીસ મથકની હદમાં સામેલ સમ્રાટ ઈન્ડસ્ટ્રીયલ-ગોકુલધામમાં વિનિત એન્જિનિયરિંગ નામના કારખાના બહાર પૈસાની લેતીદેતી બાબતે એક નેપાળી યુવકની હત્યાનો બનાવ બને છે. આ હત્યા ગોવિંદ કાલુરામ ખાન (ઠકુરી) (ઉ.વ.હાલ ૪૫)એ કરી હોવાનો ખુલાસો થાય છે પરંતુ ત્યાં સુધીમાં ગોવિંદ ફરાર થઈ જતાં તેની શોધખોળ શરૂ કરવામાં આવી છે.

દરમિયાન તાજેતરમાં જ ક્રાઈમ બ્રાન્ચની ટીમને બાતમી મળે છે કે ગોવિંદ અત્યારે તમીલનાડુના તીરુનેલવેલીમાં છુપાઈ ગયો છે. આ બાતમી મળતાં જ પીઆઈ એમ.આર.ગોંડલિયા, એમ.એલ.ડામોર અને સી.એચ.જાદવના માર્ગદર્શન હેઠળ પીએસઆઈ એ.એન.પરમાર, એમ.કે.મોવલિયા તેમજ ટીમના એએસઆઈ જલદીપસિંહ વાઘેલા, સંજય ખાખરિયા સહિતના તીરૂનલવેલી પહોંચે છે. જો કે અહીં ગોવિંદને શોધવો એ ઘાસમાંથી સોય શોધવા જેવું કપરું કામ હોય પોલીસ દ્વારા આઈડિયા અખત્યાર કરવામાં આવે છે.

પોલીસ દ્વારા ત્રણ દિવસ સુધી અહીં વાસણ તેમજ નાળિયેર વેચવાનું કામ શરૂ કરવામાં આવે છે. ટીમના દરેક સ્ટાફે કોઈને શંકા ન જાય તેવો વેશ ધારણ કરી ગોવિંદનું પગેરું શોધવામાં આવ્યું અને જેવી ખરાઈ થઈ કે તુરંત જ તેને પકડીને રાજકોટ લાવવામાં આવ્યો હતો. ટીમે ત્રણ દિવસ સુધી ગોવિંદ જ્યાં રહેતો હતો તે મકાન અને તે જ્યાં કામ અર્થે જતો હતો તે જગ્યાએ ગોઠવાઈ બરાબરની વોચ રાખી હતી. ગોવિંદ તીરુનલવેલીમાં છૂટક ડ્રાઈવિંગ સહિતનું કામ કરતો હોવાનું પણ સામે આવ્યું હતું.

ટીમે કેવી જહેમત ઉઠાવવી પડી ?
સૌથી પહેલાં તો કોઈ અન્ય રાજ્યમાં જઈ ઓપરેશન પાર પાડવું એ પોલીસ માટે અત્યંત કપરું કામ બની જતું હોય છે કેમ કે ઘણી વખત જે-તે રાજ્યની સ્થાનિક પોલીસ દ્વારા પણ પૂરતો સાથ-સહકાર મળતો હોતો નથી આમ છતાં કોઈ પણ ભોગે આરોપીને પકડીને જ લાવવો છે તેનું બીડું ઝડપીને રવાના થયેલી ટીમ અને તેમાં પણ ખાસ કરીને રાજકોટ ક્રાઈમ બ્રાન્ચ હજુ સુધી ક્યારેય ખાલી હાથે પરત ફરી નથી ત્યારે આ ઓપરેશનમાં પણ અત્યંત વિપરિત સ્થિતિ વચ્ચે આરોપીને પકડવામાં આવ્યો હતો. ખાસ કરીને તમીલનાડુમાં બોલાતી ભાષા અને ગુજરાતી ભાષા વચ્ચે જમીન-આસમાનનો ફરક હોય સ્ટાફે તેમાં તાલમેલ બેસાડવો કપરો બની ગયો હતો. આ ઉપરાંત ત્યાંના સ્થાનિકાો જવલ્લેજ બૂટ પહેરતાં હોય તેનો પણ ત્યાગ કરીને ચપ્પલ પહેરવા પડ્યા હતા. આ પછી ત્યાંના લોકોનો વાત કરવાનો હાવભાવ અને કપડાં પહેરવાની સ્ટાઈલ સહિતનું ધ્યાન રાખવું પડ્યું હતું. સૌથી મોટો પડકાર એ હતો કે જ્યાં આ ઓપરેશન પાર પાડ્યું તે તીરુનલવેલીમાં રહેતાં લોકો ઘઉંવર્ણો દેખાવ ધરાવતાં હોય છે જ્યારે ટીમના લોકોને પહેલી નજરે જોતાં તેઓ બહારના રાજ્યમાંથી જ આવ્યા હોય તેવું લાગ્યા વગર રહેતું ન હોય તેવો દેખાવ ધારણ કરવો પડ્યો હતો.

સ્કૂટર-વાસણ દૈનિક ૫૦૦ રૂપિયાના ભાડે મેળવ્યા
તીરુનેલવેલી પહોંચ્યા બાદ ટીમે સૌથી પહેલાં આરોપીના ઘર આસપાસ વોચ રાખવા માટે સ્કૂટર પર વાસણની ફેરી કરતાં એક વ્યક્તિનો સંપર્ક કરવામાં આવ્યો હતો અને તેની સાથે ભાંગેલું-તૂટેલું અંગ્રેજી બોલીને દૈનિક ૫૦૦ રૂપિયાના ભાડે વાસણ અને સ્કૂટર મેળવાયું હતું. વળી, જેટલા વાસણ વેચાય તેમાંથી અમુક ટકાવારી સ્કૂટર-વાસણ ભાડે આપનારને ચૂકવી હતી. આ બધી જટિલ પ્રક્રિયા પૂર્ણ કર્યા બાદ ત્રણ દિવસ સુધી સ્કૂટર પર સ્ટાફે ફેરી મારી હતી.

નાળિયેરવાળાને કહ્યું, અમારે રાજકોટમાં આ ધંધો કરવો છે તો અમને વગર પગારે શીખવો…!
એકલા સ્કૂટર ઉપર વાસણની ફેરી કરીને કામ પૂર્ણ નહીં થાય તેવું લાગતાં ક્રાઈમ બ્રાન્ચની ટીમના જવાનોએ ગોવિંદના ઘર આસપાસ ઉભા રહેતાં નાળિયેરવાળાનો સંપર્ક કરાયો હતો અને તેને એમ કહેવાયું હતું કે અમારે રાજકોટમાં પણ નાળિયેરનો ધંધો કરવો છે એટલા માટે જો તે કામ શીખવશે તો વગર પગારે નોકરી કરશું. નાળિયેરવાળી વ્યક્તિ રાજી થઈ જતાં ક્રાઈમ બ્રાન્ચની ટીમ નાળિયેરના છોતરા કાઢવા લાગી હતી અને ત્રણ દિવસ સુધી આ કામ પણ કર્યું હતું !