રિક્ષા ચાલકને મારમારી બંટી-બબલીએ રિક્ષા પડાવી

મુશાફરના સ્વાંગમાં આવી વૃદ્ધને ચોટીલા લઇ જઈ લૂંટ ચલાવી : પોલીસ ફરિયાદ નોંધવા તજવીજ

રાજકોટમાં ઠગ બંટી-બબલીએ મુસાફરના સ્વાંગમાં રીક્ષામાં બેસી ચાલકને ચોટીલા નજીક લઈ જઈ માર મારી તેની રિક્ષા અને રોકડ પડાવી લીધી હોવાના આક્ષેપ સાથે રીક્ષા ચાલક વૃદ્ધ સિવિલમાં દાખલ થયા હતા. અને આ મામલે પોલીસે ગુનો નોંધવા તજવીજ કરી છે.

મળતી વિગત મુજબ રાજકોટમાં સાધુવાસવાણી રોડ ઉપર આવેલા આવાસ યોજનાના ક્વાર્ટરમાં રહેલા રણજીતભાઈ રણછોડભાઈ મૂલિયાણા નામના 63 વર્ષના વૃદ્ધ સાંજના સાતેક વાગ્યાના અરસામાં ચુનારાવાડ ચોક પાસે રીક્ષા લઈને પસાર થઈ રહ્યા હતા.ત્યારે અજાણ્યા બંટી બબલી મુસાફરના સ્વાંગમાં રિક્ષામાં બેઠા હતા અને રિક્ષાને સાત હનુમાન તરફ લઈ ગયા હતા જ્યાં સાત હનુમાન નજીક પહોંચતા બંને શખ્સોએ રણજીતભાઈ મૂલીયાણાને માર માર્યો હતો. અને ધાકધમકી આપી રીક્ષા ચોટીલા તરફ આગળ ચલાવવા કહ્યું હતું.જેથી રણજીતભાઈ મૂલીયાણાએ રીક્ષા ચોટીલા નજીક લઈને પહોંચતા બંટી બબલીએ વૃદ્ધ રીક્ષા ચાલકને ઢોર માર મારી રીક્ષા અને એક હજારની રોકડની લૂંટ ચલાવી નાસી છૂટ્યા હતા. જેથી આ મામલે થોરાળા પોલીસે ગુનો નોંધવા કાર્યવાહી કરી છે.