લાઠીથી સુરત જઈ રહેલી ખાનગી બસમાં ડ્રાઈવરે ગુજાર્યું દુષ્કર્મ
ચાલુ બસે જ મહિલા સાથે ગુજાર્યું દુષ્કર્મ: ‘પુત્રને મારી નાખવાની ધમકી’
અમરેલીના લાઠીથી સુરત આવી રહેલી ખાનગી લક્ઝરી બસમાં ડ્રાઈવરે એક મહિલા મુસાફર ઉપર દુષ્કર્મ ગુજાર્યું હોવાની ફરિયાદ નોંધાતા ભારે ચકચાર જાગી છે. લાઠીથી સુરત જતી એક ખાનગી બસના ડ્રાઈવરે મહિલાને તેના પુત્રને મારી નાખવાની ધમતી આપીને બે બે વખત દુષ્કર્મ આચર્યું હતું. આ અંગે મહિલાએ કાપોદ્રા પોલીસ મથકે ગુનો નોંધાવ્યો છે અને પોલીસે ડ્રાઈવરની ધરપકડ કરવા તજવીજ હાથ ધરી છે.
પ્રાપ્ત વિગતો અનુસાર સુરતના પર્વત પાટિયા વિસ્તારની મહિલાએ લાઠીમાં પોતાની બહેનના ઘરે જવા માટે મારુતિ નંદન ટ્રાવેલ્સની લક્ઝરી બસમાં મુસાફરી કરી હતી. ભોગ બનનારી મહિલાએ ફરિયાદમાં જણાવ્યું હતું કે, તેના સાત વર્ષના પુત્ર લાઠી ખાતે રહેતી બહેનને મળવા મારૂતિ નંદનની લક્ઝરી બસમાં ગઈ હતી. નિર્ધારિત સ્થળે પહોંચ્યા બાદ તે બસના ડ્રાઈવરે મહિલાને ફોન કરી મિત્રતા કરવા દબાણ કર્યું હતું. જે અંગે મહિલાએ સ્પષ્ટ મનાઈ કહી દીધી હતી. જો કે બીજે દિવસે તે જ બસમાં ફરીથી સુરત આવવા નીકળી ત્યારે રાતે ડ્રાઈવર બધા જ મુસાફરો સૂઈ ગયા હોય તે સ્થિતિનો લાભ લઈને પુત્રને મારી નાખવાની ધમકી આપી બે વખત દુષ્કર્મ આચર્યું હતું અને આ વાત કોઈને કરી છે તો જાનથી મારી નાખવાની ધમકી આપી હતી.
