રાજકોટમાં ડ્રગ્સની ડિલિવરી કરવા આવી રહેલી બ્યુટીશ્યન પકડાઈ

અમદાવાદથી પ્રાઈવેટ કારમાં રાજકોટ-અમદાવાદ હાઈ-વે ઉપર ઉતરી’ને એસઓજીએ દબોચી લીધી: ૫.૮૯ લાખની કિંમતનું ૫૮.૯૫ ગ્રામ મેફેડ્રોન પકડાયું
અનાથ હોવા ઉપરાંત નાનાની દવા માટે પૈસાની જરૂરિયાત હોવાને કારણે પેડલર બની ગયાનું રટણ
પોકેટ વજનકાંટો પણ મળ્યો: એસઓજીનું વધુ એક મોટું ઓપરેશન

રાજકોટમાં ડ્રગ્સ, દારૂ, ચરસ-ગાંજા સહિતની હેરાફેરી અટકાવવા માટે એડીચોટીનું જોર લગાવી કામ કરતી પોલીસ દ્વારા એક બાદ એક રેડ કરવામાં આવી રહી છે. ખાસ કરીને સ્પેશ્યલ ઓપરેશન ગ્રુપ (એસઓજી) દ્વારા છેલ્લા ઘણા સમયથી ડ્રગ્સ તેમજ ચરસ-ગાંજાના જથ્થાને પકડવામાં આવી રહ્યો છે જેમાં વધુ એકનો ઉમેરો થવા પામ્યો છે. અમદાવાદથી રાજકોટમાં ડ્રગ્સની ડિલિવરી કરવા આવી રહેલી બ્યુટીશ્યનને રાજકોટ-અમદાવાદ હાઈ-વે પરથી પકડી પાડી તેના કબજામાંથી ૫.૮૯ લાખની કિંમતનું ૫૮.૯૫ ગ્રામ ડ્રગ્સ પકડી લેવાયું હતું.

એસઓજી પીઆઈ એસ.એમ.જાડેજાના માર્ગદર્શન હેઠળ પીએસઆઈ એમ.બી.માજીરાણા, એએસઆઈ ધર્મેશ ખેર, હેડ કોન્સ્ટેબલ હાર્દિકસિંહ પરમાર સહિતની ટીમે રાજકોટ-અમદાવાદ હાઈ-વે પર બામણબોર ગામમાં જવાના જૂના રસ્તા પાસેથી મુળ અમદાવાદના વટવામાં રહેતી શ્વેતા શાંતિલાલ ઠક્કર (ઉ.વ.૨૭)ને ડ્રગ્સ સાથે પકડી પાડી હતી.

શ્વેતાની પૂછપરછમાં તેણે કબૂલાત આપી હતી કે તે પ્રાઈવેટ ગાડીમાં અમદાવાદથી રાજકોટ આવી હતી. અહીં આવ્યા બાદ હાઈ-વે ઉપર જ તે ઉતરી ગયા બાદ બીજા વાહનની રાહ જોઈ રહી હતી. તે અમદાવાદમાં બ્યુટીપાર્લર ચલાવે છે. પોતે અનાથ હોવા ઉપરાંત નાનાની સારવારના ખર્ચને પહોંચી વળવા માટે તે ડ્રગ્સ પેડલર બની ગયાનું રટણ તેણે કર્યું હતું. જો કે ઉંડાણપૂર્વકની તપાસ કરાતાં શ્વેતા પણ ડ્રગ્સની બંધાણી હોવાનું ખુલ્યું હતું. પોલીસે શ્વેતાના કબજામાંથી ડ્રગ્સ ઉપરાંત પોકેટ વજન કાંટો કબજે કર્યો હતો.