થાનગઢમાં 17 વર્ષીય સગીરા પર 8 શખ્સોએ ગુજાર્યું દુષ્કર્મ

સગીરા પ્રેમિકા સાથે ઘરેથી ભાગી જતા સાત માસ સુધી તેના મિત્રોએ અલગ-અલગ સ્થળે દેહ પીંખ્યો : પોલીસે સગીરાને શોધી કાઢયા બાદ સાત શખ્સોએ બળાત્કાર કર્યા હોવાનું ખુલતા ગુનો નોંધાયો

ગુજરાતમાં એક બાદ એક દુષ્કર્મની ઘટનાઓ સામે આવી રહી છે જેમાં વધુ એક ઘટનાનો ઉમેરો થયો છે. સુરેન્દ્રનગર જિલ્લાના થાનગઢમાં ઘરેથી પ્રેમી સાથે ભાગેલી 17 વર્ષીય સગીરા ઉપર આઠ શખ્સોએ અલગ અલગ સમયાંતરે દુષ્કર્મ આચાર્યાનો કિસ્સો પોલીસ દફતરે પહોંચતા ભારે ખળભળાટ મચી જવા પામ્યો હતો.જયારે આ મામલે થાનગઢ પોલીસે આઠ સામે ગુનો નોંધીને ત્રણ શખ્સોની ધરપકડ કરી છે.

મળતી વિગતો અનુસાર થાનગઢમાં શક્તિ નગર ખાતે રહેતી 17 વર્ષની સગીરાની માતાએ થાનગઢ પોલીસ સ્ટેશનમાં પોતાની ફરિયાદમાં આરોપીમાં થાનગઢમાં ગામે રહેતા અજય ભરવાડ, અજય મલાભાઈ અલગોતર, શૈલેષ ઉકાભાઇ અલગોતર, ધ્રુવ મહેન્દ્રભાઈ ચાવડા, કૌશિક ઉર્ફે લાલો હરેશભાઇ ગૌસ્વામી, વિજયસિંહ નરેન્દ્રસિંહ સોલંકી અને દર્શન મુકેશભાઈ સદાદીયા અને મદદગારી કરનાર કાના ઉર્ફે હરિનું નામ આપતા જણાવ્યું હતું કે, તા.15-10 ના રોજ સગીરાનું તેના પ્રેમી દ્વારા અપહરણ કરવામાં આવ્યું હતું.ત્યારબાદ તેણીને પ્રેમીના મિત્રોએ બંનેના પરિવારને સમજાવી અને બંનેને એક કરવા મદદ કરશે તેવા બહાને અલગ અલગ સ્થળોએ સાતેય શખ્સ લઇ ગયા હતા અને તેમની પર સાતેક મહિનામાં અનેક વાર દુષ્કર્મ ગુજાર્યું હતું.

આ મામલે સગીરા ગુમ થયા અંગેની પરિવારજનોએ ફરિયાદ નોંધાવી આ ફરિયાદને આધારે પોલીસ તપાસ શરૂ કરી હતી અને સગીરા હેમખેમ મળી આવતા પોલીસે રાહતનો શ્વાસ લીધો હતો અને સગીરાને તેમના પરિવારજનોને સોપતા પીડિત સગીરા હેબતાઇ ગઇ હોય મહિલા પોલીસ દ્વારા તેમનુ કાઉન્સેલિંગ કરવામાં આવતા ચોકાવનારી વિગતો મળી હતી અને તેણી પર પ્રેમીના મિત્રોએ વારાફરતી અલગ અલગ સ્થળો પર દૂષ્કર્મ ગુજાર્યુ હોવાનું જણાવતા પોલીસ દ્વારા ગુનો નોંધવામાં આવ્યો હતો.અને પીડિત સગીરાનું મેડિકલ ચેકઅપ કરવા તજવીજ હાથ ધરવામાં આવી છે.

દુષ્કર્મ ગુજારનાર ત્રણ શખસોની ધરપકડ કરવામાં આવી છે : ડીવાયએસપી વિશાલ રબારી

ડીવાયએસપી વિશાલ રબારીએ જણાવ્યું હતું કે, થાનગઢ પોલીસમાં ફરિયાદ નોંધાઈ છે. ફરિયાદીના કહ્યા મુજબ તેમની દીકરી સાથે અલગ અલગ સમયે અલગ અલગ વ્યકિત દ્વાર દુષ્કર્મ ગુજારવામાં આવ્યું છે. દીકરીની ઉંમર 17 વર્ષની હોય અને તેણીને પ્રેમી દ્વારા ઘરેથી બળજબરી પૂર્વક લઈ જવામાં આવી હતી.અને તેના મિત્રો દ્વારા બંનેને મદદ કરવામાં આવશે તેવું કહી સાત મહિનાના સમયગાળામાં અલગ અલગ સ્થળે દુષ્કર્મ ગુજારવામાં આવ્યું હતું. હાલ પોલીસે ગુનો નોંધી ત્રણ આરોપીની ધરપકડ કરવામાં આવી છે.અને અન્યની શોધખોળ કરવામાં આવી રહી છે.