મ્યુલ એકાઉન્ટમાં છેતરપિંડીના પૈસા જમાકરાવી સાયબર માફિયાઓએ 21.12કરોડ ઉપાડી લીધાઃ ખાતું ભાડે આપનારને
મળ્યા માંડ એક હજારથી દસ હજાર પોલીસના `ઓપરેશન મ્યુલ હન્ટ’ હેઠળ ભાડે અપાયેલા એકાઉન્ટની યાદી તૈયાર, એક બાદ એક ગુના દાખલ કરાશે 19 સામે ગુના દાખલ 11ની ધરપકડ
રાજકોટ જ નહીં બલ્કે આખા દેશમાં સાયબર ફ્રોડમાં ચિંતાજનક વધારો થઈ રહ્યો હોય માફિયાઓને ડામવા માટે કેન્દ્ર-રાજ્ય સરકાર એક બાદ એક પગલાં ઉઠાવી રહી છે. ખાસ કરીને ફ્રોડના પૈસા જે-તે બેન્ક એકાઉન્ટમાં જમા થઈને સાયબર ઠગ પાસે પહોંચતાં હોવાથી પોલીસે હવે આવા એકાઉન્ટને ટાર્ગેટ' કરી મામૂલી કમિશનની લાલચે પોતાનું એકાઉન્ટ ભાડે આપી દેનારા લોકો સામે ગુના દાખલ કરવાનું શરૂ કર્યું છે. આ કાર્યવાહીનેઓપરેશન મ્યુલ હન્ટ’ નામ આપવામાં આવ્યું છે ત્યારે એવો ચોંકાવનારો ખુલાસો થયો છે કે રાજકોટમાં 300થી વધુ બેન્ક ખાતા સાયબર ફ્રોડ માટે ઉપયોગમાં લેવાઈ રહ્યા છે !
રિક્ષાચાલકો, મજૂર, શાકભાજીના ફેરિયા સહિતના લોકો દ્વારા એકાઉન્ટ ખોલાવ્યા બાદ તેની આખીયે કિટ જેમાં એટીએમ કાર્ડ, ચેકબુક સહિતનું સાહિત્ય પોતાનાથી ઉપરના મતલબ કે પરિચિત હોય તેવા શખસોને આપી દેવામાં આવે છે. આ પછી એકાઉન્ટમાં લાખો રૂપિયા જમા થાય એટલે એકાઉન્ટધારકના પરિચીત એવા શખસો એ પૈસા ઉપલી પાર્ટી મતલબ કે ત્રીજી લેયરના વ્યક્તિને ઉપાડીને આપી દે છે. એકંદરે આ તમામ રકમ વિદેશમાં પહોંચી જતી હોવાથી પોલીસે સૌથી નીચેની કડી સામે કાર્યવાહી કરવાનું શરૂ કર્યું છે.
પોલીસે બે દિવસની અંદર આવા 19 શખસો સામે ગુનો દાખલ કરી 11ની ધરપકડ કરી છે. તપાસમાં ખુલ્યા પ્રમાણે આ એકાઉન્ટસમાં સાયબર માફિયાઓ દ્વારા 21.12 કરોડ રૂપિયા ઉપાડી લેવામાં આવ્યા છે અને તેના બદલામાં ખાતું ભાડે આપનારને એક હજારથી દસ હજાર સુધીનું કમિશન જ ચૂકવ્યું છે. આ ગોરખધંધો છેલ્લા ત્રણેક વર્ષથી ચાલી રહ્યાનું પણ ધ્યાને આવ્યું છે ત્યારે ટૂંક સમયમાં જ `રડાર’ પર રહેલા એકાઉન્ટના ધારકો સામે પણ ગુના દાખલ કરી તેમની ધરપકડ કરવામાં આવશે.
