શેરબજારમાં તોફાની તેજી, સેન્સેક્સ 1330 પોઈન્ટ ઉછળ્યો : રોકાણકારોની સંપત્તિમાં છ લાખ કરોડનો વધારો

મુંબઈ

શેરબજારમાં શુક્રવારે તોફાની તેજી જોવા મળી હતી અને અંતે ગ્રીન ઝોનમાં બંધ થયું હતું. સેન્સેક્સ 1,330 પોઈન્ટના ઉછાળા સાથે 80,436 પર બંધ રહ્યો હતો. નિફ્ટી પણ લગભગ 397 પોઈન્ટ વધીને 24,541ના સ્તરે બંધ થયો હતો. સવારે બજાર 800 પોઈન્ટથી વધુના ઉછાળા સાથે ખુલ્યું હતું, જોકે બાદમાં તેમાં 200 પોઈન્ટનો ઘટાડો જોવા મળ્યો હતો. હવે બજારમાં ફરી તેજી આવી છે. આઈટી, ઓટો, મીડિયા, રિયલ્ટી અને ઓઈલ એન્ડ ગૅસ શેરોમાં ખરીદી જોવા મળી હતી.

શેરબજારમાં મજબૂત ઉછાળાને કારણે રોકાણકારોની સંપત્તિમાં જોરદાર ઉછાળો જોવા મળ્યો હતો. બીએસઈ પર લિસ્ટેડ શેરોનું માર્કેટ કેપ ફરીથી રૂપિયા 450 લાખ કરોડને પાર કરી ગયું છે અને રૂપિયા 450.35 લાખ કરોડ સુધી પહોંચી ગયું છે, જે ગત સત્રમાં રૂપિયા 444.29 લાખ કરોડ હતું. આજના છેલ્લા સત્રમાં રોકાણકારોની સંપત્તિમાં રૂપિયા છ લાખ કરોડથી વધુનો વધારો જોવા મળ્યો હતો.

શુક્રવારે OLA ઈલેક્ટ્રીકના શેરમાં સૌથી મોટો વધારો જોવા મળ્યો હતો, જેણે આજે 20 ટકાની અપર સર્કિટ ફટકારી છે. લાંબા ગાળામાં, ડીએલએફના શેર 5 ટકા, વિપ્રોના શેર 4.26 ટકા, પાવર ફાઇનાન્સ કોર્પ 4 ટકા, પોલિસી બજારના શેર 8 ટકા, પીરામિલ એન્ટરપ્રાઇઝ 7.36 ટકા, એમપીસા 7 ટકા, સીડીએસએલના શેર 9 ટકા, ઝેન્સાર ટેક્નોલોજી 7.73 ટકા અને નિપ્પોન ઇન્ડિયા એએમસી 7.49 ટકા વધ્યો હતો. NSEના કુલ 2,797 શેરમાંથી 1,872 શેરમાં વધારો જોવા મળ્યો હતો.