શેરબજારમાં રેકોર્ડ અનરાધાર : સેન્સેક્સ 79,300 અને નિફ્ટી 24050 ને પાર
રોજેરોજ નવી નવી ઉંચાઈએ પહોંચતો સૂચકાંક : રોકાણકારો એક જ દિવસમાં ૧.૬૭ લાખ કરોડ કમાયા
શેરબજારમાં તોફાની તેજી આજે સતત ત્રીજા દિવસે પણ ચાલુ રહી હતી અને આજે સેન્સેક્સ તથા નિફ્ટીએ રેકોર્ડ બનાવ્યા હતા. આજે સેન્સેક્સ 79,300 અને નિફ્ટી 24050ને પાર પહોંચી ગયો હતો. આજની તેજીને લીધે રોકાણકારોને ૧.૬૭ લાખ કરોડ રૂપિયાની કમાણી થઇ હતી.
આજના કારોબારના અંતે સેન્સેક્સ 569 પોઈન્ટના ઉછાળા સાથે 79,243 પોઈન્ટ અને નેશનલ સ્ટોક એક્સચેન્જનો નિફ્ટી 175 પોઈન્ટના ઉછાળા સાથે 24,044 પોઈન્ટની સપાટીએ બંધ રહ્યો હતો.
બજારમાં આજનો ઉછાળો આઈટી અને એનર્જી શેરોને આભારી હતી.
આજના ટ્રેડિંગ સેશનમાં શાનદાર ઉછાળાને કારણે માર્કેટ કેપ પણ મજબૂત વધારા સાથે બંધ થયું હતું. બી.એસ.ઈ. ઉપર લિસ્ટેડ શેરોનું માર્કેટ કેપ રૂ. 438.69 લાખ કરોડના સ્તરે બંધ થયું હતું, જે અગાઉના સત્રમાં રૂ. 437.02 લાખ કરોડના સ્તરે બંધ થયું હતું. એટલે કે આજના સત્રમાં રોકાણકારોની સંપત્તિમાં રૂ. 1.67 લાખ કરોડનો વધારો થયો છે.
આજના સેશનમાં આઈટી શેરોમાં જોરદાર ઉછાળો જોવા મળ્યો હતો. નિફ્ટીનો આઈટી ઈન્ડેક્સ 2 ટકાના વધારા સાથે બંધ થયો હતો. આ સિવાય ઓટો, એફએમસીજી, મેટલ્સ, એનર્જી, હેલ્થકેર, ઓઈલ એન્ડ ગેસ સેક્ટરના શેરોમાં ઉછાળો જોવા મળ્યો હતો. જ્યારે મીડિયા, ફાર્મા અને બેન્કિંગ શેરોમાં ઘટાડો નોંધાયો હતો. મિડકેપ શેરો ઉછાળા સાથે બંધ થયા જ્યારે સ્મોલકેપ શેરો ઘટાડા સાથે બંધ થયા હતા.
