રોકાણકારોની આતુરતાનો અંત : જિયો ફાઈનાન્શિયલ સર્વિસિસના શેરનું સોમવારે લીસ્ટીંગ
રિલાયન્સ ઈન્ડસ્ટ્રીઝના શેરધારકોને એકની સામે JFSLનો એક શેર મળશે
રિલાયન્સ ઈન્ડસ્ટ્રીઝમાંથી તાજેતરમાં ડિમર્જ થયેલી કંપની જિયો ફાઈનાન્શિયલ સર્વિસિસના શેર સોમવારે શેરબજારમાં લિસ્ટ થવાના છે. જે શેરધારકો પાસે રિલાયન્સ ઈન્ડસ્ટ્રીઝના શેર છે તેમને 1:1ના રેશિયોમાં જિયો ફાઈનાન્શિયલ સર્વિસિસના શેર મળ્યા છે અને ગયા અઠવાડિયે જ તેમના ડિમેટ એકાઉન્ટમાં શેર જમા થઈ ગયા છે. એટલે કે 20 જુલાઈની રેકોર્ડ ડેટ પર જે લોકો પાસે રિલાયન્સ ઈન્ડ.ના શેર હતા તેમને તેટલી જ સંખ્યામાં JFSLના શેર મળશે.
BSEએ જણાવ્યું કે 10 ટ્રેડિંગ દિવસ સુધી આ શેર ટ્રેડ-ફોર-ટ્રેડ સેગમેન્ટમાં હશે અને સોમવારે JIOFINના સિમ્બોલ સાથે તેમાં ટ્રેડિંગ શરૂ થઈ જશે. રેકોર્ડ ડેટ પર સ્પેશિયલ પ્રાઈસ ડિસ્કવરી સેશન યોજાયું હતું જેમાં આ શેરની પ્રિ-લિસ્ટિંગ પ્રાઈસ 261.85 રૂપિયા પ્રતિ શેર ઉપજી હતી. બ્રોકરેજે આ શેરનો ભાવ 190 રૂપિયા રહેવાની અપેક્ષા વ્યક્ત કરી હતી જેની તુલનામાં પ્રિ-લિસ્ટિંગ પ્રાઈસ ઉંચી આવી છે. રિલાયન્સ ઈન્ડ.નો એક્વિઝિશન કોસ્ટ પ્રતિ શેર 133 રુપિયા થાય છે.
તેના કારણે NBFC કંપની જિયો ફાઈનાન્શિયલ સર્વિસિસની માર્કેટ કેપિટલાઈઝેશન 1.66 લાખ કરોડ અથવા 20.3 અબજ ડોલર આંકવામાં આવે છે. આ ભાવે તે ભારતમાં બીજા ક્રમની સૌથી મોટી NBFC છે અને ભારતની 32મી સૌથી વધુ વેલ્યૂ ધરાવતી કંપની છે. જિયો ફાઈનાન્શિયલ સર્વિસિસની સાઈઝ હવે ટાટા સ્ટીલ, કોલ ઈન્ડિયા, HDFC Life અને SBI Life કરતા પણ મોટી છે.
અત્યારે બજાજ ફાઈનાન્સ એ ભારતની સૌથી મોટી એનબીએફસી છે જેની માર્કેટ કેપિટલ 4.2 લાખ કરોડ છે. જેએફએસએલનું જ્યારે શેરબજારમાં લિસ્ટિંગ થશે ત્યારે તે બીજા નંબરની કંપની હશે. ત્યાર પછી ત્રીજા નંબર પર ચોલામંડલમ ઈન્વેસ્ટમેન્ટ એન્ડ ફાઈનાન્સ હશે જે અત્યારે બીજા નંબર પર છે અને તેની માર્કેટ કેપિટલ 83,000 કરોડ રૂપિયા છે.
JFSL હવે બજાજ હોલ્ડિંગ્સ એન્ડ ઈન્વેસ્ટમેન્ટ કરતા પણ મોટી કંપની બની જશે જે એક હોલ્ડિંગ કંપની છે. આ ઉપરાંત તેની સાઈઝ SBI કાર્ડ્સ, શ્રીરામ ફાઈનાન્સ, મુથ્થુટ ફાઈનાન્સ અને Paytm જેવા ફાઈનાન્શિયલ ટેક્નોલોજી પ્લેટફોર્મ કરતા પણ મોટી હશે. JFSLને નિફ્ટી 50, BSE સેન્સેક્સ અને બીજા ઈન્ડેક્સમાં પણ સામેલ કરવામાં આવ્યો છે. આ શેર સ્વતંત્ર રીતે ટ્રેડ થવા લાગે ત્યાં સુધી તે કોન્સ્ટન્ટ પ્રાઈસ પર રહેશે. 24 ઓગસ્ટે તેને તમામ ઈન્ડેક્સમાંથી દૂર કરાશે. 24 ઓગસ્ટે JFSL માટે 261.8 રૂપિયાના ભાવની ધારણા કરતા નુવામાએ જણાવ્યું કે નિફ્ટી પેસિવ ટ્રેકર્સ લગભગ 90 મિલિયન શેરનું વેચાણ કરે તેવી શક્યતા છે જે લગભગ 29 કરોડ ડોલરની વેલ્યૂ થઈ શકે છે.