આફ્રિકા સામે વન-ડે શ્રેણી માટે ટીમ ઈન્ડિયાનું એલાન : રાહુલ કેપ્ટન,જાડેજા-પંતની વાપસી,રોહિત-કોહલીની પણ પસંદગી

ભારત-આફ્રિકા વચ્ચે ટેસ્ટ શ્રેણી બાદ વન-ડે શ્રેણી રમાવાની છે. આ શ્રેણી માટે ટીમ ઈન્ડિયાનું એલાન કરવામાં આવ્યું હતું. ગૌહાટીમાં ટેસ્ટ મેચના બીજા દિવસે પસંદગી સમિતિની બેઠક મળી હતી જેમાં કે.એલ.રાહુલને વન-ડે શ્રેણી માટે કેપ્ટન બનાવવામાં આવ્યો હતો. રાહુલને આ જવાબદારી શુભમન ગીલ અને શ્રેયસ અય્યરની ગેરહાજરી બાદ અપાઈ હતી. ટીમનો કેપ્ટન શુભમન ગીલ કોલકત્તા ટેસ્ટમાં ઈજાગ્રસ્ત થયો હતો ત્યારે વાઈઇ કેપ્ટન અય્યરને ઑસ્ટ્રેલિયા પ્રવાસે વન-ડે શ્રેણી દરમિયાન ઈજા પહોંચતાં તે બહાર થઈ ગયો હતો.

30 નવેમ્બરથી રાંચીમાં ભારત-આફ્રિકા વચ્ચે ત્રણ મેચની આ શ્રેણીની શરૂઆત થશે. ટીમનો વિકેટકિપર-બેટર રાહુલ બે વર્ષ બાદ ફરીથી આ ફોર્મેટમાં ટીમની કમાન સંભાળશે. સંયોગથી પાછલી વખતે પણ તે આફ્રિકા વિરુદ્ધ જ 2023મા વન-ડે શ્રેણીમાં ટીમ ઈન્ડિયાની કમાન સંભાળી રહ્યો હતો.

આ પણ વાંચો :***નું કામ ભસવાનું છે, આપણે કામ પર ધ્યાન આપો : કોર્પોરેટરે સોશ્યલ મીડિયા પર મુક્યું સ્ટેટસ,કોના તરફ ઈશારો?વાંચો કાનાફૂસી

ટીમની વાત કરવામાં આવે તો અપેક્ષા પ્રમાણે જ વિરાટ કોહલી અને રોહિત શર્માને ટીમમાં પસંદ કરાયા છે પરંતુ આ ઉપરાંત ચાર ખેલાડીઓની પણ વાપસી થઈ છે જેમાં સૌથી મોટું નામ ઑલરાઉન્ડર રવિન્દ્ર જાડેજાનું છે. ચેમ્પિયન્સ ટ્રોફીમાં ટીમનો મહત્ત્વનો હિસ્સો રહેલા રવિન્દ્ર જાડેજાને ઑસ્ટ્રેલિયા પ્રવાસ માટે પસંદ કરાયો ન્હોતો. જાડેજા ઉપરાંત ઋષભ પંતને પણ પસંદ કરાયો છે. 2023 બાદ ઋતુરાજ ગાયકવાડની પણ પહેલીવાર વન-ડે ટીમમાં વાપસી થઈ છે જ્યારે તિલક વર્માની પણ તક અપાઈ છે. બુમરાહને આરામ આપવામાં આવ્યો છે તો અક્ષર પટેલને પણ પસંદ કરાયો નથી.

ટીમ ઈન્ડિયા

કે.એલ.રાહુલ (કેપ્ટન), રોહિત શર્મા, યશસ્વી જયસ્વાલ, વિરાટ કોહલી, તિલક વર્મા, ઋષભ પંત, વોશિંગ્ટન સુંદર, રવિન્દ્ર જાડેજા, કુલદીપ યાદવ, નીતિશકુમાર રેડ્ડી, હર્ષિત રાણા, ઋતુરાજ ગાયકવાડ, પ્રસિદ્ધ કૃષ્ણા, ધ્રુવ જુરેલ, અર્શદીપ સિંહ