બિહારમાં ‘વહી ધનુષ્ય,વહી બાણ’ નીતિશ કુમાર 10મી વખત બન્યા મુખ્યમંત્રી: વડાપ્રધાન મોદીએ ગમછો લહેરાવીને લોકોનું અભિવાદન ઝીલ્યું
બિહાર વિધાનસભા ચૂંટણીમાં 202 બેઠકો જીતનાર રાષ્ટ્રીય લોકશાહી ગઠબંધન માટે આજે ઐતિહાસિક દિવસ છે. ગાંધી મેદાન ખાતે નીતિશ કુમારે 10મી વખત મુખ્યમંત્રી તરીકે શપથ લીધા. સમ્રાટ ચૌધરી અને વિજય સિંહાને ફરીથી નાયબ મુખ્યમંત્રી બનાવવામાં આવ્યા. વડા પ્રધાન નરેન્દ્ર મોદી, કેન્દ્રીય ગૃહ પ્રધાન અમિત શાહ, અનેક કેન્દ્રીય પ્રધાનો, NDAના તમામ ઘટક પક્ષોના વડાઓ, NDA શાસિત રાજ્યોના મુખ્યમંત્રીઓ અને વરિષ્ઠ નેતાઓ મંચ પર હાજર રહ્યા હતા.
વડાપ્રધાને ગમછો લહેરાવીને લોકોનું અભિવાદન ઝીલ્યું
પટનાના ઐતિહાસિક ગાંધી મેદાનમાં આયોજિત આ સમારોહને NDA માટે શક્તિ પ્રદર્શન તરીકે જોવામાં આવી રહ્યું છે. આનું કારણ એ છે કે વડા પ્રધાન નરેન્દ્ર મોદી, ગૃહ પ્રધાન અમિત શાહ, ભાજપના રાષ્ટ્રીય અધ્યક્ષ જેપી નડ્ડા અને અનેક ભાજપ-એનડીએ શાસિત રાજ્યોના મુખ્યમંત્રીઓ મંચ પર હાજર હતા. સમારોહના અંતે પીએમ મોદીનો અનોખો અંદાજ જોવા મળ્યો હતો. તેમણે ગમછો લહેરાવીને લોકોનું અભિવાદન ઝીલ્યું હતુ. સમારોહ દરમિયાન, બધા નેતાઓએ વડાપ્રધાન નરેન્દ્ર મોદી અને નીતિશ કુમારના નેતૃત્વની પ્રશંસા કરી અને બિહારની નવી સરકારને શુભેચ્છાઓ પાઠવી.
નવા મંત્રીમંડળના 26 મંત્રીઓએ પણ શપથ લીધા
નીતિશ કુમારની સાથે, તેમના નવા મંત્રીમંડળના 26 મંત્રીઓએ પણ શપથ લીધા. જેમાં ભાજપના 14 અને જેડીયુ ક્વોટાના 8 સભ્યોનો સમાવેશ થાય છે. 26 નવા મંત્રીઓમાં, એક મુસ્લિમ અને ત્રણ મહિલાનો સમાવેશ થાય છે. ત્રણ પહેલી વાર મંત્રી બન્યા છે. સમારોહમાં ભાજપના વરિષ્ઠ નેતાઓ અને નાયબ મુખ્યમંત્રી સમ્રાટ ચૌધરી અને વિજય કુમાર સિંહાએ પણ મંત્રી તરીકે શપથ લીધા.
ગાંધી મેદાનમાં “બિહારમાં ફરી એકવાર નીતિશ કુમાર” ના નારા ગુંજ્યા.
ગાંધી મેદાન સુંદર રીતે શણગારવામાં આવ્યું હતું. સમારોહમાં હજારો JDU-BJP કાર્યકરો અને જનતા હાજર રહી હતી. મંચ પરથી “બિહારમાં ફરી એકવાર નીતિશ કુમાર” ના નારા ગુંજી ઉઠ્યા.
26 મંત્રીઓએ શપથ લીધા
નીતીશ કુમાર ઉપરાંત, NDA સરકારના 26 મંત્રીઓએ પણ ગાંધી મેદાનમાં મંત્રી તરીકે શપથ લીધા. ભાજપ વિધાનસભા પક્ષના નેતા સમ્રાટ ચૌધરી અને ઉપનેતા વિજય કુમાર સિંહાએ નાયબ મુખ્યમંત્રી તરીકે શપથ લીધા. સમ્રાટ ચૌધરી અને વિજય સિંહા ઉપરાંત, ભાજપના સભ્યો મંગલ પાંડે, ડૉ. દિલીપ જયસ્વાલ, નીતિન નવીન, રામકૃપાલ યાદવ, સંજય સિંહ, અરુણ શંકર પ્રસાદ, સુરેન્દ્ર મહેતા, નારાયણ પ્રસાદ, રામા નિષાદ, લખેન્દ્ર પાસવાન, શ્રેયસી સિંહ અને ડૉ. પ્રમોદ કુમાર ચંદ્રવંશીએ પણ બિહાર સરકારમાં મંત્રી તરીકે શપથ લીધા.
આઠ JDU મંત્રીઓએ શપથ લીધા
શપથ સમારોહમાં નીતિશ કુમારની પાર્ટી, JDU ના આઠ મંત્રીઓએ પણ શપથ લીધા. JDU તરફથી મંત્રી તરીકે શપથ લેનારાઓમાં વિજય કુમાર ચૌધરી, શ્રવણ કુમાર, વિજેન્દ્ર યાદવ, અશોક ચૌધરી, લેસી સિંહ, મોહમ્મદ જામા ખાન, મદન સાહની અને ડૉ. પ્રમોદ કુમારનો સમાવેશ થાય છે.
આ ધારાસભ્યોએ પણ પદના શપથ લીધા
વધુમાં, ચિરાગ પાસવાનની પાર્ટીના સંજય કુમાર (પાસવાન) અને સંજય સિંહે મંત્રી તરીકે શપથ લીધા. આ દરમિયાન, જીતન રામ માંઝી અને ઉપેન્દ્ર કુશવાહાના પક્ષના સંતોષ કુમાર સુમન અને દીપક પ્રકાશે પણ નવી સરકારમાં મંત્રી તરીકે શપથ લીધા.
નીતિશ 10મી વખત મુખ્યમંત્રી બન્યા
બિહારમાં નવી NDA સરકાર રચાઈ છે. નીતિશ કુમાર 10મી વખત બિહારના મુખ્યમંત્રી તરીકે શપથ લીધા છે. નીતિશ પહેલી વાર નવેમ્બર 2005માં મુખ્યમંત્રી બન્યા હતા. ત્યારબાદ તેમણે 2010, 2015 (બે વાર), 2017, 2020, 2022 (બે વાર) અને 2024માં સેવા આપી હતી. તેમણે હવે બિહારના મુખ્યમંત્રી તરીકે પોતાનો ૧૦મો કાર્યકાળ શરૂ કર્યો છે. તેઓ બિહારના સૌથી લાંબા સમય સુધી સેવા આપનારા મુખ્યમંત્રીઓમાંના એક બન્યા છે.
NDAનું નોંધપાત્ર વળતર
તાજેતરમાં પૂર્ણ થયેલી વિધાનસભા ચૂંટણીમાં ભાજપની આગેવાની હેઠળના NDA ગઠબંધન પ્રચંડ બહુમતી સાથે સત્તામાં પાછું આવ્યું. NDAએ 202 બેઠકો જીતી, જ્યારે વિપક્ષી મહાગઠબંધને 35 બેઠકો જીતી.
