રાજકોટ : પ્રેમ રોગમાં યુવકે પ્રેમિકાને છરી ઝીંકી પોતાના પેટમાં ઘા મારી કર્યો આપઘાતનો પ્રયાસ,બંનેની હાલત ગંભીર
રાજકોટ શહેરના છેવાડે આવેલા સરધાર ગામે પ્રેમ રોગમાં સપડાયેલા યુવલ શહેરના છેવાડે આવેલા સરધાર પ્રેમિકાના ઘરમાં ઘૂસી છરીના ઘા ઝીંક્યા બાદ પોતે પણ પોતાની હાથે પેટમાં છરી મારી દઈ ખૂની ખેલ ખેલ્યો હતો. ઘટના અંગે જાણ થતાં આજીડેમ પોલીસ મથકનો સ્ટાફ દોડી જઈ બંનેને સારવાર અર્થે ખસેડ્યા હતા. પ્રાથમિક તપાસમાં યુવકને પ્રેમિકા સાથે લગ્ન કરવા હોય જેને લઈને તેણે પત્ની સાથે ઝઘડો કર્યો હતો બાદમાં આ વાતને લઈને પ્રેમિકા સાથે માથાકૂટ થતાં ઘટનાના અંજામ આપ્યો હતો. હાલ બંને ગંભીર હાલતમાં સારવાર હેઠળ હોય ત્યારે પોલીસે ગુનો નોંધાવ તજવીજ હાથ ધરી છે.
બનાવની વિગતો મુજબ, સરધાર ગામે ઘાંચી ચોક નજીક એક મકાનમાં માથાકૂટ ચાલી રહી હોય તેવી માહિતી મળતા જ આજીડેમ પોલીસ મથકના પીઆઈ એ.બી જાડેજા સહિતનો કાફલો દોડી ગયો હતો. ઘરમાં તપાસ કરતા એક યુવતી અને યુવક લોહી લુહાણ હાલતમાં પડ્યા હતા પોલીસે તુરંત 108માં બંનેને સારવારમાં ખસેડ્યા હતા.
આ પણ વાંચો :રાજકોટનો કેયુર વાઘેલા વર્લ્ડ ઓફ ડાન્સમાં ચમક્યો: માધુરી દીક્ષિત,સુનિલ શેટ્ટી,રેમો ડિસોઝાએ આપ્યું છે સ્ટેન્ડિંગ ઓવેશન
બનાવ અંગે તપાસ કરતા જાણવા મળ્યું હતું કે, ઈજાગ્રસ્ત યુવકનું નામ નિકુંજ અરવિદભાઈ વેકરીયા (ઉંમર 30 રહે. બાપા સીતારામ ચોક રાજકોટ) જ્યારે યુવતીનું નામ હિના ભરતભાઈ બૂડાસણા (ઉંમર 30) છે. દરમિયાન યુવતીની હાલત ગંભીર હોય જેથી તેને ખાનગી હોસ્પિટલમાં ખસેડવામાં આવી હતી. જયારે યુવકને સિવિલ હોસ્પિટલમાં ઈમરજન્સી વિભાગમાં દાખલ કરવામાં આવ્યો હતો.
પોલીસની તપાસમાં સામે આવ્યું હતું કે, ઈજાગ્રસ્ત નિકુંજ મૂળ જામકંડોરણા તાલુકાના રાજપરા ગામનો વતની છે અને તેના લગ્ન પાંચ વર્ષ પૂર્વ થઈ ગયા છે. હિના તેની પ્રેમિકા હોય ત્યારે નિકુંજને હિના સાથે લગ્ન કરવા હતા જેથી તેણે પત્ની સાથે આ બાબતે ઝઘડો કરતા તેણી માવતરે ચાલી ગઈ હતી. દરમિયાન ગઈકાલે સવારે 11 વાગ્યા આસપાસ હિના ઘરે હોય ત્યારે આરોપી નિકુંજ છરી લઈને ઘસી આવ્યો હતો. જે બાદ બંને વચ્ચે લગ્નની વાતને લઈને માથાકૂટ થતાં ઉશ્કેરાઈને નિકુંજે પોતાની પાસે રહેલી છરી વડે હીનાને ગળાના ભાગે અને પેટમાં એમ બે ઘા ઝીંકી દીધા હતા.
પ્રેમિકાને છરી ઝીંકી નિકુંજે પ્રથમ તો પોતાનો ડાબા હાથની નસ કાપવાનો પ્રયાસ કરી પેટમાં છરીના બે ઘા ખૂંપાવી દીધા હતા. સારવારમાં રહેલી યુવતીએ બંને ફ્રેન્ડ છે તેવું રટણ કર્યા બાદ બેભાન થઈ ગયી હતી. ઘટના અંગે પોલીસે બંનેના પરિવારને જાણ કરતા તેઓ હોસ્પિટલે દોડી આવ્યા હતા. સિવિલ હોસ્પિટલે આવેલ નિકુંજના પરિવારે તેને વધુ સારવાર અર્થે ખાનગી હોસ્પિટલમાં ખસેડ્યો હતો. ઘટનાને લઈને આજીડેમ પોલીસ મથકના સ્ટાફે હત્યા પ્રયાસ સહિતની કલમો હેઠળ ગુનો નોંધવા તજવીજ હાથ ધરી હતી. પોલીસ સૂત્રોના જણાવ્યા મુજબ, હાલ બંનેની હાલત અતિ ગંભીર છે.
