રાજ્યના પુરવઠા વિભાગના કોમ્પ્યુટર ઓપોરેટરોની દિવાળી સુધરી : કોમ્પ્યુટર ઓપરેટરોને મહિને 15 હજાર પગાર ચૂકવવા આદેશ

રાજકોટ સહિત રાજ્યભરમાં પુરવઠા વિભાગની ઝોનલ કચેરીઓ તેમજ તાલુકા મામલતદાર કચેરીમાં કામ કરતા કોમ્પ્યુટર ઓપરેટરોની દિવાળી સુધરી છે. અત્યાર સુધી કોન્ટ્રાકટર એજન્સીઓ દ્વારા ઓપરેટરોનું શોષણ કરી મહિને તનતોડ મહેનત કરનાર ઓપરેટરોને માંડ નવથી દસ હજાર પગાર ચુકવવામાં આવતો હોય આ મામલે રાજ્યના પુરવઠા વિભાગને ફરિયાદ કરવામાં આવતા સંયુક્ત નિયામકે તમામ જિલ્લા પુરવઠા અધિકારીઓને હુકમ કરી તમામ ઓપરેટરને મહિને 15 હજાર પગાર ચૂકવાય તે જોવા સૂચના આપી છે.

આ પણ વાંચો :બોનસ આપો: પૂર, હોનારત, ભૂકંપ સમયે રાત દિવસ જોયા વગર કામગીરી કરનાર વિદ્યુત સહાયકોને બોનસ ચૂકવવા ઉર્જા મંત્રી સમક્ષ માંગ

પ્રાપ્ત વિગતો મુજબ રાજકોટ સહિત રાજ્યભરમાં પુરવઠા વિભાગની વિવિધ ઝોનલ કચેરી તેમજ તાલુકા મામલતદાર કચેરીમાં કોન્ટ્રાકટ હેઠળ કોમ્પ્યુટર ઓપરેટર પુરા પાડવામાં આવી રહ્યા છે જેમાં કોન્ટ્રાકટર દ્વારા કલેકટરના નાક નીચે જ આ ઓપરેટરોને લઘુતમ વેતનધારાનો ભંગ કરી માત્ર 9000થી લઈ 11 હજાર સુધીનું જ મહેનતાણું ચુકવવામાં આવતું હોવાથી ગુજરાત રાજ્ય મહેસુલી પુરવઠા ઓપરેટર મહામંડળ દ્વારા સરકારમાં રજુઆત કરવામાં આવી હતી જેને પગલે રાજ્યના 676 ડેટા એન્ટ્રી ઓપરેટરોને 15 હજાર પગાર ચૂકવવા મંજૂરી આપવામાં આવી હતી તેમ છતાં કોન્ટ્રાકટર દ્વારા અમલ કરવામાં ન આવતો હોવાનું ધ્યાને આવ્યું છે.

આ પણ વાંચો :રાજકોટના આસામીને ખેડૂત પ્રમાણપત્ર આપવાની અપીલ નામંજુર કરતા કલેકટર : આટકોટમાં 1967માં તમામ જમીન વેચી નાખતા ગુમાવ્યો દરજ્જો

બીજી તરફ આ ગંભીર બાબતે રાજ્યના અન્ન અને નાગરિક પુરવઠા વિભાગના સંયુક્ત નિયામક ચેતન ગાંધી દ્વારા રાજ્યના તમામ પુરવઠા અધિકારીને લેખિત સૂચના જાહેર કરી મહેસુલી પુરવઠા ઓપરેટર મહામંડળની રજુઆત સંદર્ભે તમામ કોમ્પ્યુટર ઓપરેટરોને પુરવઠા વિભાગના નિયમ અને મંજૂરી મુજબ મહિને 15 હજાર પગાર ચૂકવાય તેવી વ્યવસ્થા ગોઠવવા આદેશ કરતા પુરવઠા વિભાગના ઓપરેટરોમાં દિવાળી સમયે જ હવેથી સારો પગાર મળશે તેવી આશા બંધાઈ છે.