રાજકોટમાં સરકારી જમીન ઉપર ગુલાબની ખેતી! રેલનગરમાં પૂર્વ મામલતદારે રૂ.24 કરોડની જમીન ખુલ્લી કરાવી

રાજકોટ શહેરના રેલનગર વિસ્તારમાં પોપટપરા સ્મશાન પાસે ભૂમાફિયાઓ દ્વારા ટાઉન પ્લાનિંગ સ્કીમ અંતર્ગત કલેકટર તંત્રને ફાળવવામાં આવેલ અંદાજે 10 એકર જેટલી જમીન પચાવી પાડી સરકારી જમીન ઉપર ગુલાબની ખેતી કરવાનું શરૂ કરી દેતા રાજકોટ શહેર પૂર્વ મામલતદાર કચેરી દ્વારા ઓપરેશન ડિમોલિશન હાથ ધરી અંદાજે 24 કરોડની કિંમતની જમીન દબાણ મુક્ત કરી હતી. જો કે, અહીં લાંબા સમયથી ગુલાબની ખેતી થતી હોવા છતાં મામલતદાર તંત્ર દબાણ કરનાર તત્વોની ઓળખ મેળવી શક્યા ન હતા.

પ્રાપ્ત વિગતો મુજબ રાજકોટ શહેર પૂર્વ વિસ્તારમાં આવેલ રેવન્યુ સર્વે નંબર 625 પૈકી ટી.પી.19ના એફ.પી. 29/6માં રેલનગરમાં પોપટપરા સ્મશાન પાસે આવેલ રૂપિયા 24 કરોડથી વધુ કિંમતની અંદાજે 10 એકર એટલે કે, 40 હજાર ચોરસ મીટર સરકારી જમીન ઉપર લાંબા સમયથી ગુલાબની ખેતી કરવામાં આવતી હોવાની ફરિયાદ મળતા સીટી પૂર્વ મામલતદાર દ્વારા અહીં નોટિસ ચિપકાવી દબાણ કરનાર તત્વોની શોધખોળ કરી હતી પરંતુ કોઈ જ વ્યક્તિ સામે ન આવતા અંતે શુક્રવારે ઇન્ચાર્જ મામલતદાર અજિત જોશી, સર્કલ ઓફીસર સત્યમભાઇ શેરસીયા, તલાટી ઘારાબેન વ્યાસે ચૂસ્ત પોલીસ બંદોબસ્ત સાથે ત્રણેક ઓરડી અને ગુલાબના વાવેતર ઉપર ઓપરેશન ડિમોલિશનમાં બુલડોઝર ચલાવી જમીન ખુલ્લી કરાવી હતી.

આ પણ વાંચો : રાજકોટના લાપાસરી ગામે યુવતીની છેડતી કરી 2 શખસોએ માર માર્યો : યુવતી સારવાર હેઠળ,પોલીસે વધુ તપાસ હાથ ધરી