પાક.સૈન્ય વડા મુનિર વરદી પહેરેલા લાદેન છે! પેન્ટાગોનના પૂર્વ અધિકારી માઇકલ રૂબીને રોષ ઠાલવ્યો, પ્રતિબંધ મુકવા કરી માગ
અમેરિકા અને રશિયા વચ્ચે થનારી પ્રસ્તાવિત બેઠક પહેલા પેન્ટાગોનના પૂર્વ અધિકારી માઈકલ રુબિને પાકિસ્તાન અને તેના સેના પ્રમુખ જનરલ મુનીર પર આકરા પ્રહારો કર્યા હતા. રુબિને મુનીરને વરદી પહેરેલો ઓસામા બિન લાદેન ગણાવ્યો છે. તેના પર અમેરિકામાં પ્રતિબંધ જ મૂકી દેવો જોઈએ. એમણે તો ત્યાં સુધી કહ્યું છે કે પાકના પરમાણુ હથિયારોની સુરક્ષા અમેરિકાએ પોતાના હાથમાં લઈ લેવી જોઈએ.
રૂબિને અમેરિકન પ્રમુખ ટ્રમ્પના અભિગમ પર પણ સવાલ ઉઠાવ્યા. તેમણે કહ્યું કે ટ્રમ્પ એક બિઝનેસમેન છે અને હોર્સ ટ્રેડિંગના આદી છે, પરંતુ એ સમજવું મહત્વપૂર્ણ છે કે ખોટો શાંતિ કરાર ખરેખર યુદ્ધને આગળ વધારી શકે છે. ટ્રમ્પની મહત્ત્વાકાંક્ષા નોબેલ શાંતિ પુરસ્કાર જીતવાની છે, પરંતુ તેમણે સમજવું જોઈએ કે આતંકવાદને માત્ર એક જ ચશ્માથી ન જોઈ શકાય.
પેન્ટાગોનના આ પૂર્વ અધિકારીએ પાકિસ્તાન પર પરમાણુ હથિયારોથી લઈને આંતરરાષ્ટ્રીય સમુદાયને ધમકાવવાનો આરોપ લગાવ્યો હતો. તેમના મતે જ્યારે કોઈ દેશ અડધા વિશ્વને પરમાણુ હથિયારોથી ધમકાવે છે, તેથી એ સ્પષ્ટ સંકેત છે કે તેણે એક કાયદેસર રાજ્ય બનવાનો અધિકાર ગુમાવી દીધો છે.
આ પણ વાંચો : દેવાયત ખવડે તાલાલામાં દીધો ‘મોરે મોરો’: અમદાવાદના ડાયરાની જૂની માથાકૂટમાં કાર સાથે કાર અથડાવી કર્યો હુમલો, એકને ઇજા
રુબિને તો એમ પણ કહ્યું હતું કે અમેરિકાએ હવે પાકિસ્તાન પ્રત્યેની પોતાની નીતિઓ પર ગંભીરતાથી પુનર્વિચાર કરવો જોઈએ. તેમનું માનવું છે કે, ભવિષ્યમાં અમેરિકન વહીવટીતંત્રે પાકિસ્તાન જઈને તેના પરમાણુ હથિયારોની સુરક્ષા પોતાના હાથમાં લેવાનું વિચારવું પડશે, કારણ કે આ વિકલ્પ એટલો ખતરનાક છે કે તેને અવગણી શકાય નહીં. અમેરિકા અને રશિયા વચ્ચે પ્રસ્તાવિત વાટાઘાટો પહેલાથી જ વૈશ્વિક રાજકીય વાતાવરણમાં ચર્ચાનું કેન્દ્ર બની ગઈ છે.
