પત્ની શારીરિક સંબંધ બનાવવાની ના પાડે તો છૂટાછેડા થઈ શકે : મુંબઈ હાઇકોર્ટનો મહત્વનો ચુકાદો,જાણો શું છે સમગ્ર મામલો

બોમ્બે હાઈકોર્ટે એક મહત્ત્વપૂર્ણ નિર્ણયમાં કહ્યું છે કે જો કોઈ પત્ની પોતાના પતિનું મિત્રોની સામે અપમાન કરે છે, પતિ સાથે સેક્સ કરવાનો ઇનકાર કરે છે અને તેના પર પાયાવિહોણા એક્સ્ટ્રા મેરિટલ અફેરના સંબંધોનો આરોપ લગાવે છે, તો આ વર્તન “ક્રૂરતા” ની શ્રેણીમાં આવે છે અને હિન્દુ લગ્ન કાયદા હેઠળ છૂટાછેડા માટે યોગ્ય આધાર છે. કોર્ટે મહિલાની અરજી રદ કરી દીધી હતી.

જસ્ટિસ રેવતી મોહિતે ડેરે અને જસ્ટિસ ડૉ. નીલા ગોકલેની ડિવિઝન બેન્ચે આ ચુકાદો આપ્યો હતો. કોર્ટ એક મહિલાની અરજી પર સુનાવણી કરી રહી હતી, જેમાં તેણે પુણે ફેમિલી કોર્ટના નવેમ્બર 2019 ના નિર્ણયને પડકાર્યો હતો. ફેમિલી કોર્ટે પતિને છૂટાછેડા લેવાની મંજૂરી આપી હતી. પત્નીએ આ હુકમને પણ પડકાર્યો હતો.

આ દંપતીએ ડિસેમ્બર 2013 માં લગ્ન કર્યા હતા, પરંતુ એક વર્ષમાં જ, બંને પરસ્પર મતભેદોને કારણે અલગ થઈ ગયા. જુલાઈ 2015 માં, મહિલાએ તેના પતિ અને સાસરિયાઓ વિરુદ્ધ પોલીસ ફરિયાદ નોંધાવી હતી, જેમાં તેણે માનસિક ત્રાસ, સ્ત્રીધનને રાખવા અને તેને ઘરમાંથી કાઢી મૂકવા જેવા આરોપો લગાવ્યા હતા. જોકે, બાદમાં મહિલાએ ફેમિલી કોર્ટમાં ‘વૈવાહિક અધિકારોની પુનઃસ્થાપના’ માટે અરજી દાખલ કરી, જેમાં તેણે કહ્યું કે તે લગ્નને ખતમ કરવા માંગતી નથી, તેનાથી વિપરીત, પતિએ ક્રૂરતા અને પરિત્યાગના આધારે છૂટાછેડા માટે અરજી કરી હતી.

આ પણ વાંચો : અસલામત પોલીસ : ટંકારામાં તપાસ કરવા ગયેલી પોલીસ ટીમ પર આરોપીના પરિવારજનોનો હુમલો

2019 માં, પુણે ફેમિલી કોર્ટે પત્નીની અરજી ફગાવી દીધી અને પતિને છૂટાછેડા આપ્યા. આની સામે, મહિલાએ 2021 માં બોમ્બે હાઇકોર્ટમાં અપીલ કરી અને દર મહિને 10,000 રૂપિયા ભરણપોષણની માંગણી પણ કરી. હાઇકોર્ટે મધ્યસ્થી દ્વારા બંને પક્ષોને સમાધાન કરાવવા માટે ઘણી વખત પ્રયાસ કર્યો, પરંતુ કોઈ પરિણામ આવ્યું નહીં. કોર્ટે સ્પષ્ટ કર્યું કે બંને વચ્ચે સમાધાન થવાની કોઈ શક્યતા નથી અને કોર્ટમાં રજૂ કરાયેલા પુરાવાના આધારે પત્નીના આરોપો ખોટા હોવાનું જાણવા મળ્યું છે. કોર્ટે મહિલાની અરજી ફગાવી દીધી હતી.