અમેરિકાથી દેશનિકાલ કરાયેલા ભારતીયોના કેસમાં મોટી કાર્યવાહી : અમૃતસરના 40 ટ્રાવેલ એજન્ટના લાઇસન્સ રદ
અમેરિકાથી દેશનિકાલ કરાયેલા ભારતીય નાગરિકોના કિસ્સામાં પંજાબ સરકારે કડક કાર્યવાહી શરૂ કરી દીધી છે. સોમવારે અમૃતસર પ્રશાસને આ મામલે મોટું પગલું ભર્યું અને 40 ટ્રાવેલ એજન્ટો સામે કાર્યવાહી કરી છે. વહીવટીતંત્રે આ એજન્ટોના લાઇસન્સ રદ કર્યા છે, જેનાથી લોકોને ગેરકાયદેસર રીતે વિદેશ મોકલતા નેટવર્ક પર કડક કાર્યવાહી કરવાની દિશામાં એક મહત્વપૂર્ણ પગલું ભર્યું છે.
પનામાથી 12 ભારતીયોને ડિપોર્ટ કર્યા
અહેવાલો અનુસાર, અમેરિકાથી પનામા મોકલવામાં આવેલા 12 ભારતીય નાગરિકોને લઈને એક ફ્લાઇટ રવિવારે (23મી ફેબ્રઆરી) સાંજે નવી દિલ્હીના ઈન્દિરા ગાંધી આંતરરાષ્ટ્રીય એરપોર્ટ પહોંચી હતી. પનામાથી પરત લાવવામાં આવેલા ભારતીયોનો આ પહેલું ગ્રુપ હતું. અગાઉ અમેરિકાએ ગેરકાયદે રીતે અમેરિકામાં પ્રવેશવાનો પ્રયાસ કરી રહેલા લગભગ 332 ગેરકાયદે ઇમિગ્રન્ટ્સને ડિપોર્ટ કર્યા હતા.
અમેરિકાની ગેરકાયદે ઈમિગ્રન્ટ્સ સામે કડક કાર્યવાહી
ઉલ્લેખનીય છે કે, અમેરિકન પ્રમુખ ડોનાલ્ડ ટ્રમ્પે ગેરકાયદે ઈમિગ્રન્ટ્સ સામે કડક કાર્યવાહી કરી રહ્યા છે. થોડા દિવસો પહેલા અમેરિકાએ ત્રણ વિમાનો દ્વારા ઘણાં ગેરકાયદે ભારતીય ઇમિગ્રન્ટ્સને દેશમાં પાછા લાવવામાં આવ્યા હતા. અત્યાર સુધીમાં કુલ 332 ભારતીય નાગરિકોને અમેરિકાથી દેશનિકાલ કરીને ભારત મોકલવામાં આવ્યા છે. લાખો ભારતીયો હજુ પણ અમેરિકામાં ગેરકાયદે રીતે રહે છે, અને આ દેશનિકાલ ઝુંબેશ આગામી મહિનાઓમાં ચાલુ રહી શકે છે.
