કટરાથી શ્રીનગર વચ્ચે ટ્રેનનો સફળ ટ્રાયલ રન

જમ્મુના કટરાથી શ્રીનગર વચ્ચે બીછાવવામાં આવેલી રેલ લાઈન ઉપર ટ્રેનનો ટ્રાયલ રન સફળ રીતે પૂરો થયો છે. જમ્મુ અને કાશ્મીરમાં ઉધમપુર-શ્રીનગર-બારામુલ્લા રેલ લિંક પ્રોજેક્ટના ભાગ રૂપે, કટરા-બડગામ રેલ્વે ટ્રેક પર ટ્રાયલ રન થયો હતો. ૧૮ કોચની ટ્રાયલ ટ્રેન સવારે ૮ વાગ્યે કટરા રેલ્વે સ્ટેશનથી કાશ્મીર જવા રવાના થઈ હતી . ટ્રાયલનું નિરીક્ષણ કરી રહેલા રેલવે અધિકારીઓએ જણાવ્યું હતું કે આ છેલ્લો ટેસ્ટ રન હતો.આ ટ્રેનમાં ૧૮ એ.સી.બોગી, બે લગેજ વાન અને બે એન્જિન સામેલ હતા.

૪૧ હજાર કરોડ રૂપિયાના ખર્ચે બનેલા આ પ્રોજેક્ટની કુલ લંબાઈ ૨૭૨ કિમી છે. ટનલની લંબાઈ ૧૧૧ કિ.મી. છે. ૧૨.૭૭ કિમી.રસ્તો ટનલની અંદર છે. આ અંતર ટ્રેને ચાર કલાકમાં પૂરું કર્યું હતું. આ પ્રોજેક્ટમાં ટી-49 ટનલ સૌથી લાંબી છે. રિયાસી જિલ્લા માં ચિનાબ નદી પર બનેલો વિશ્વનો સૌથી ઊંચો રેલ્વે પુલ પણ આ પ્રોજેક્ટનો એક ભાગ છે. પુલની લંબાઈ ૧૩૧૫ મીટર છે, જ્યારે નદીના પટથી તેની ઊંચાઈ ૩૫૯ મીટર છે. તેને બનાવવામાં લગભગ 20 વર્ષ લાગ્યા, જ્યારે તેનો ખર્ચ 1,486 કરોડ રૂપિયા થયો.

ભારતીય રેલ્વેનો પહેલો કેબલ બ્રિજ પણ આ પ્રોજેક્ટનો એક ભાગ છે. આ પ્રોજેક્ટ દ્વારા ભારતીય રેલ્વેએ વધુ એક સીમાચિહ્ન હાંસલ કર્યું છે. અંજી ખાડ પરનો પુલ ભારતીય રેલ્વેનો પ્રથમ કેબલ-સ્ટેડ પુલ છે. આ પુલ નદીના પટથી ૩૩૧ મીટરની ઊંચાઈએ બનેલો છે. તેને ટેકો આપવા માટે ૧૦૮૬ ફૂટ ઊંચો ટાવર બનાવવામાં આવ્યો છે, જે લગભગ ૭૭ માળની ઇમારત જેટલો ઊંચો છે. આ પુલ અંજી નદી પર બનેલો છે જે રિયાસી જિલ્લાને કટરા સાથે જોડે છે. ચેનાબ પુલથી તેનું અંતર ફક્ત 7 કિલોમીટર છે. આ પુલની કુલ લંબાઈ 725.5 મીટર છે. આમાંથી, 472.25 મીટરનો પટ કેબલ પર રહેલો છે.