ગુજરાતમાં દર બીજી મિનિટે ૬૪૭૨ રૂપિયાનો ટ્રાફિકનો દંડ ફટકારાય છે
છેલ્લા ચાર વર્ષમાં રાજ્યને ૬૮૦ કરોડ રૂપિયાની દંડની આવક
સરકારે લોકસભામાં આપી માહિતી
દંડ વસુલવામાં બિહાર સૌથી આગળ
ટ્રાફિકનાં ચલણ ઇસ્યુ કરવામાં ગુજરાત ઘણું આગળ છે. અહી સરેરાશ દર બીજી મીનીટે ૬૪૦૦ રૂપિયાનો દંડ ફટકારવામાં આવે છે છેલ્લા ચાર વર્ષની વાત કરીએ તો ૨૦૧૯ થી ૨૦૨૩ વચ્ચે ૩૩.૪૦ લાખ ચલણ ઇસ્યુ કરવામાં આવ્યા છે અને તેમાંથી ૬૮૦ કરોડ રૂપિયાનો દંડ વસુલવામાં આવ્યો છે. તાજેતરમાં લોકસભામાં કેન્દ્ર સરકારે આ માહિતી આપી હતી.
દંડ વસુલવામાં ગુજરાત દેશમાં ચોથા સ્થાને છે. પહેલા નંબરે બિહાર છે. જ્યાં ચાર વર્ષમાં ૪૩.૪ લાખ ચલણ મારફત ૧૪૦૩ કરોડની આવક સરકારને થઇ છે. આ મુજબ જોઈએ તો પ્રતિ વ્યક્તિ ૩૨૩૪ રૂપિયાનો દંડ થયો છે. બીજા નંબરે રાજસ્થાન છે જ્યાં ૫૮.૫ લાખ ચલણ ઇસ્યુ થયા છે અને ૧૩૯૩ કરોડની આવક થઇ છે. મહારાષ્ટ્રમાં ૩૦.૯ લાખ ચલણ મારફત ૯૪૪ કરોડની આવક થઇ છે. આ રાજ્યોમાં એક થી વધુ વખત એક જ વ્યક્તિને ચલણ ઇસ્યુ થયા હોય તેવું પણ બન્યું છે.
ગુજરાતમાં દર બે મીનીટે ૩ ચલણ ઇસ્યુ થાય છે અને તે પેટે રાજ્યને બે મીનીટે ૬૪૭૨ રૂપિયાની આવક થાય છે. નિષ્ણાતોના જણાવ્યા અનુસાર, આ રીતે જોઈએ તો દર વરસે ૧૭૦ કરોડ રૂપિયાની આવક રાજ્ય સરકારને થાય છે. જે એક નાના સરકારી પ્રોજેક્ટના ખર્ચ જેટલી છે. રાજ્ય સરકારને જે દંડની આવક થાય છે તે મોટાભાગે શહેરી વિસ્તારમાંથી થાય છે કારણ કે ત્યાં રોડ ચેકિંગ પણ હોય છે અને સીસીટીવી પણ હોય છે.
