લે બોલો !! વીજકર્મીને પોલીસે દંડ ફટકાર્યો તો પોલીસ સ્ટેશનનો જ વીજ પુરવઠો કાપી નાખ્યો
હેલ્મેટ વગર પકડાઈ જતાં પોલીસે દંડ ફટકારતાં વીજ કર્મચારીએ અનોખો બદલો લીધો હતો. પોલીસ સ્ટેશનના બાકી વીજ બિલની ગણતરી કરી સમગ્ર પોલીસ સ્ટેશનનો વીજ પુરવઠો બે કલાક માટે કાપી નાખ્યો હતો. જેના કારણે પોલીસ સ્ટેશનમાં સંપૂર્ણ અંધકાર છવાઈ ગયો હતો. જ્યારે મામલો સત્તાધીશો સુધી પહોંચ્યો ત્યારે ઉતાવળમાં વીજળી પુનઃસ્થાપિત કરવામાં આવી હતી. હવે આ ઘટના અંગે પોલીસ સ્ટેશન અને વીજ વિભાગ બંને મૌન છે, પરંતુ દંડ ફટકારવાનો આવો બદલો અગાઉ ક્યારેય જોવા મળ્યો ન હોવાની આ વિસ્તારમાં ભારે ચર્ચા છે !!
મળતી વિગતો અનુસાર આ ઘટના ઉત્તર પ્રદેશના ગાઝીપુરમાં બની છે. ડંડીવા ગામનો જયપ્રકાશ વીજવિભાગના ગાઝીપુર સબ-સ્ટેશનમાં કૉન્ટ્રૅક્ટ બેઝ પર સ્ટેશન ઑપરેટરની નોકરી કરે છે. ગુરુવારે સાંજે ઘરેથી જમીને તે સબ-સ્ટેશન પર નોકરી કરવા જતો હતો. તે બાઇક પર જતો હતો, પણ ટ્રાફિકના નિયમ પ્રમાણે તેણે હેલ્મેટ નહોતી પહેરી. ગાઝીપુર ચાર રસ્તા પર પોલીસની એક ટીમ વાહનચાલકોને ટ્રાફિકના નિયમોનું પાલન કરાવતી હતી.
એ પોલીસે જયપ્રકાશને ઊભો રાખ્યો. હેલ્મેટ નહોતી પહેરી એટલે દંડ કરવા માટે ચલણની પાવતી ફાડી. જયપ્રકાશે બહુ કાલાવાલા કર્યા, પણ પોલીસ ન માની. જયપ્રકાશ બહુ ગુસ્સે થયો, પણ સાથે તેણે ચાલાકી વાપરી. જયપ્રકાશે પહેલાં અધિકારીઓ પાસેથી પોલીસ-સ્ટેશનના બાકી નીકળતા વીજબિલની રકમ જાણી લીધી. એ પછી લાઇનમૅનને બોલાવીને વીજપુરવઠો કાપી નાખ્યો. વાત મળી કે તરત જ વીજવિભાગના અધિકારીઓએ તાત્કાલિક જોડાણ પાછું શરૂ કર્યું. ગાઝીપુર પોલીસ-સ્ટેશનમાં બે કલાક સુધી અંધારું રહયું હતું.
