ટ્રમ્પના હીવટીતંત્રમાં એલોન મસ્ક અને ભારતવંશી રામાસ્વામીને મોટી જવાબદારી

ડોનાલ્ડ ટ્રમ્પે ડિપાર્ટમેન્ટ ઓફ ગવર્નમેન્ટ એફિશિયન્સી’ના વડા તરીકે ટેસ્લા અને સ્ટાર લિંકના માલિક વિશ્વના સૌથી શ્રીમંત ઉદ્યોગપતિ એલોન મસ્કઅને ભારતવંશી અમેરિકન ઉદ્યોગ સાહસિક વિવેક રામા સ્વામીની નિમણૂક કરી હતી. આ બંને આ વિભાગનું સહનતૃત્વ કરશે.

અત્રે નોંધનીય છે કે અમેરિકન પ્રમુખ પદની ચૂંટણીમાં એલોન મસ્કે ડોનાલ્ડ ટ્રમ્પ માટે ખુલ્લીને પ્રચાર કર્યો હતો અને 100 મિલિયન ડોલરનું દાન કર્યું હતું. પ્રચાર ઝુંબેશ દરમિયાન એલોન મસ્કે ડિપાર્ટમેન્ટ ઓફ ગવર્નમેન્ટ એફિશિયન્સી નામનો નવું વહીવટી માળખું ઊભું કરવાનું સૂચન કર્યું હતું અને તેનું નેતૃત્વ કરવાની ઈચ્છા પણ દર્શાવી હતી. ટ્રમ્પે એ વિચારને જાહેરમાં આવકાર્યો હતો. આ બંને મહાનુભાવો ‘ સેવ અમેરિકા મુવમેન્ટ ‘ અંતર્ગત ભ્રષ્ટાચાર, કાયદાઓની અતિશયોક્તિ અને બાબુશાહીને નષ્ટ કરશે તેવો વિશ્વાસ ડોનાલ્ડ ટ્રમ્પે વ્યક્ત કર્યો હતો.

કોણ છે વિવેક રામા સ્વામી ??

વિવેક રામાસ્વામી ના તામિલભાષી બ્રાહ્મણ માતા-પિતા કેરાળા થી અમેરિકામાં સ્થાયી થયા હતા. 38 વર્ષના વિવેક રામાસ્વામી નો જન્મ ઓહીઓ ખાતે 9 ઓગસ્ટ 1985 ના રોજ થયો હતો. તેઓ રોમન કેથોલિક સ્કૂલમાં ભણ્યા હતા પણ સાથે જ હિન્દુ મંદિરોમાં દર્શન કરવાનું ચૂકતા નહીં. તેમણે હાર્વર્ડ યુનિવર્સિટીમાંથી બાયોલોજીની અને યેલ યુનિવર્સિટી માંથી લો ની ડિગ્રી પ્રાપ્ત કરી હતી. રામાસ્વામીએ હેજ ફંડ ઇન્વેસ્ટર તરીકે કારકિર્દીની શરૂઆત કરી હતી અને ગ્રેજ્યુએટ થયા એ પહેલાં જ કરોડપતિ બની ગયા હતા. 2014માં તેમણે પોતાની રોઇન્ટ સાયન્સ નામની બાયોટેક કંપનીની સ્થાપના કરી હતી. ફોર્બસ મેગેઝીને તેમની સંપત્તિ 630 મિલિયન ડોલર હોવાનો અંદાજ આપ્યો હતો. વિવેક રામાસ્વામી સામાજિક ન્યાય અને ક્લાઈમેટ ચેન્જના હિમાયતી છે. આ વખતે ચૂંટણીના પ્રારંભે તેમણે રિપબ્લિકન પાર્ટીની આંતરિક ચૂંટણીમાં ડોનાલ્ડ ટ્રમ્પ સામે ઝંપલાવ્યું હતું. જોકે બાદમાં તેમણે ટ્રમ્પને સમર્થન જાહેર કરી પોતાની ઉમેદવારી પરત ખેંચી લીધી હતી.

સીઆઈએના ડાયરેક્ટર અને નવારક્ષામંત્રી બંને ચીન વિરોધી વલણ માટે પ્રખ્યાત

ડોનાલ્ડ ટ્રમ્પે સીઆઈએ ના ડાયરેક્ટર પદે તેમના અત્યંત વિશ્વાસુ અને ગાઢ સાથે જોન રેટક્લિફની અને નવા રક્ષા મંત્રી તરીકે પેટ હેગસેથની નિમણુક કરી હતી.આ બંને નેતાઓ ચીનના કટર વિરોધી હોવાની ખ્યાતિ ધરાવે છે. નોંધનીય છે કે સીઆઇએના ડાયરેક્ટર પદે એક સમયે ભારતવંશી ‘ કાશ ‘ કશ્યપ પટેલ નું નામ ગાજ્યું હતું. પરંતુ ડોનાલ્ડ ટ્રમ્પે 2016 ના તેમના કાર્યકાળના અંતિમ તબક્કામાં ડાયરેક્ટર ઓફ નેશનલ ઇન્ટેલિજન્સ તરીકે ફરજ બજાવનાર જોન રેટક્લિફ ઉપર પસંદગી ઉતારી હતી.

રેટક્લિફ સામે જે તે સમયે ડેમોક્રેટ્સ અને ભૂતપૂર્વ ઇન્ટેલિજન્સ અધિકારીઓએ ટ્રમ્પના રાજકીય હરીફોને સકંજામાં લેવા માટે ચોક્કસ ઇન્ટેલિજન્સ રિપોર્ટ્સ ડી ક્લાસીફાઈ કર્યા હોવાનો આક્ષેપ કર્યો હતો. તેમની નિમણૂક કરતી વેળાએ ડોનાલ્ડ ટ્રમ્પે તેમને ક્લિન્ટનની ચૂંટણી ઝુંબેશ માં રશિયાની મિલીભગત થી લઇ અને એફબીઆઈ દ્વારા નાગરિક સ્વાતંત્ર્ય સામે સતાના દુરુપયોગનો પર્દાફાશ કરી સત્ય અને પ્રમાણિકતાના યોદ્ધા તરીકે અમેરિકન જનતા પડખે ઊભા રહેનાર લડવૈયા ગણાવ્યા હતા. તેમણે કહ્યું કે જો બાઇડેનના પુત્ર હન્ટરના લેપટોપ વિશે એફબીઆઇના એકાવન અધિકારીઓ ખોટું બોલતા હતા ત્યારે એકમાત્ર રેટક્લિફે અમેરિકાની જનતાને સત્ય જણાવ્યું હતું.

ટ્રમ્પે રક્ષા મંત્રી તરીકે પેટ હેગસેથને અમેરિકન હિતોના રક્ષક અને આજીવન યોદ્ધા ગણાવ્યા હતા. તેમણે કહ્યું કે હેગથેસના નેતૃત્વ હેઠળ અમેરિકન મીલીટરી ફરીથી મહાન બનશે. અમેરિકાનો કદી ઝુકશે નહી કદી પીછેહઠ નહી કરે.