મહારાષ્ટ્રના ડેપ્યુટી સ્પીકર ત્રીજા માળેથી કૂદી પડ્યા…ST અનામતનો વિરોધ, વિડીયો થયો વાયરલ
રાષ્ટ્રવાદી કોંગ્રેસ પાર્ટી-અજિત પવાર જૂથના ધારાસભ્ય અને મહારાષ્ટ્ર વિધાનસભાના ડેપ્યુટી સ્પીકર નરહરી ઝિરવાલ શુક્રવારે મહારાષ્ટ્ર મંત્રાલયની છત પરથી કૂદીને સલામતી નેટ પર પડ્યા હતા. મુંબઈમાં મહારાષ્ટ્ર સરકારના વહીવટી મુખ્યાલય, મંત્રાલયના ત્રીજા માળેથી તેણે કૂદકો માર્યો હતો. ઝિરવાલ ધનગર સમુદાયને અનુસૂચિત જનજાતિ ક્વોટામાંથી અનામત આપવાનો વિરોધ કરી રહ્યા છે. આ ઘટનાનો વીડિયો વાયરલ થઈ રહ્યો છે, જેમાં ધારાસભ્ય અને અન્ય ત્રણ લોકો ત્રીજા માળેથી કૂદીને જાળમાં ફસાઈ ગયા હતા. પોલીસની મદદથી તેઓને ત્યાંથી બહાર કાઢવામાં આવ્યા હતા.
ઝિરવાલ અને એસટી ધારાસભ્યોનું કહેવું છે કે એસટી ક્વોટા હેઠળ ધનગર સમાજને અનામત ન આપવી જોઈએ. નરહરી ઝિરવાલ અજિત પવારની પાર્ટીના ધારાસભ્ય છે અને અજીત હાલમાં ભાજપના નેતૃત્વ હેઠળના મહાયુતિ ગઠબંધનનો એક ભાગ છે.
તમને જણાવી દઈએ કે મહારાષ્ટ્રમાં ધનગર સમુદાય લાંબા સમયથી એસટીનો દરજ્જો આપવાની માંગ સાથે આંદોલન કરી રહ્યો છે. તાજેતરમાં જ ધનગર સમાજે ‘રાસ્તા રોકો’ આંદોલન કર્યું હતું. છેલ્લા પંદર દિવસથી સમાજના છ આગેવાનો અચોક્કસ મુદ્દતની ભૂખ હડતાળ પર બેઠા છે. આ સાથે ધનગર સમાજની માંગ છે કે રાજ્ય સરકાર દ્વારા ધનગર અને ધાંગડ વચ્ચેનો તફાવત દૂર કરવા જરૂરી કાર્યવાહી કરવામાં આવે.
એવું માનવામાં આવે છે કે મહારાષ્ટ્રમાં વિધાનસભા ચૂંટણીની તારીખો 8 ઓક્ટોબર પછી ગમે ત્યારે જાહેર થઈ શકે છે. રાજ્યમાં છેલ્લા બે વર્ષથી અનામતના મુદ્દે રાજકારણ ગરમાયું છે. મરાઠા નેતા મનોજ જરાંગે પાટીલ સતત મરાઠા સમુદાય માટે અનામતની માંગ કરી રહ્યા છે.
