જમ્મુ-કાશ્મીરના બડગામમાં મોટો અકસ્માત : BSF જવાનોથી ભરેલી બસ ઊંડી ખીણમાં ખાબકતાં એકનું મોત, 28 ઘાયલ
કાશ્મીરના બડગામમાં એક મોટો અકસ્માત થયો છે. મળતી માહિતી મુજબ, BSF જવાનોથી ભરેલી બસ ઉંડી ખીણમાં પડી ગઈ છે. અહેવાલો અનુસાર, મધ્ય કાશ્મીરના બડગામ જિલ્લાના વોટરહેલ વિસ્તારમાં બ્રેઈલમાં BSF જવાનોને લઈ જઈ રહેલી બસને અકસ્માત નડ્યો હતો. બસ પડી જવાના સમાચાર મળતા જ લોકોમાં ભયનો માહોલ છવાઈ ગયો હતો. રાહતકર્મીઓ ઘટનાસ્થળે પહોંચી ગયા છે.
મળતી માહિતી મુજબ, પાંચ બસોનો કાફલો રસ્તા પર જઈ રહ્યો હતો, છેલ્લી બસ બેકાબુ થઈ ગઈ, જેના કારણે તે લગભગ 40 ફૂટ ઊંડા ખીણમાં પડી ગઈ. આ અકસ્માતમાં 28 જવાન ઘાયલ થયા છે અને એક સૈનિકનું મોત નીપજ્યું છે. ઘટનાની માહિતી મળતા જ સ્થાનિક લોકો અને પોલીસ ઘટનાસ્થળે પહોંચી ગયા હતા અને ઘાયલ જવાનોને બહાર કાઢવા માટે બચાવ કામગીરી શરૂ કરી હતી. તમામ ઘાયલ જવાનોને નજીકની હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે. રાહત અને બચાવ કાર્ય હજુ પણ ચાલુ છે.
આ પહેલા રાજૌરીમાં સેનાનું વાહન ખાડામાં પડી ગયું હતું
રાજૌરીમાં મંગળવારે રાત્રે સેનાનું એક વાહન રસ્તા પરથી લપસીને ઊંડી ખાઈમાં પડી ગયું હતું. આ અકસ્માતમાં 4 જવાનો ઘાયલ થયા છે. માહિતી મળતાની સાથે જ સ્થાનિક ગ્રામજનો સાથે બચાવકર્મીઓએ તમામ 4 ઘાયલ કમાન્ડોને બહાર કાઢ્યા અને તેમને તાત્કાલિક હોસ્પિટલમાં દાખલ કર્યા, જેમાં લાન્સ નાઈક બલજીત સિંહનું સારવાર દરમિયાન મોત થયું હતું.
સેનાના એક અધિકારીએ જણાવ્યું કે જમ્મુ અને કાશ્મીરના રાજૌરી જિલ્લામાં મંગળવારે સૈન્યના ચાર કમાન્ડો ઘાયલ થયા જ્યારે તેમનું વાહન રસ્તા પરથી લપસીને ઊંડી ખીણમાં પડી ગયું. તેમણે કહ્યું કે સરહદી જિલ્લાના માંજાકોટ વિસ્તારમાં મોડી સાંજે આ અકસ્માત થયો હતો, જેના કારણે વાહનને વ્યાપક નુકસાન થયું હતું.
