ઓટીટી પર આવી રહી છે નવી વેબ સિરીઝ “દશ જૂન કી રાત”
તુષાર કપૂર-પ્રિયંકા ચહર ચૌધરી સ્ટારર સિરિઝનું ટ્રેલર થયું રિલીઝ
પ્રિયંકા ચહર ચૌધરી અને તુષાર કપૂર સ્ટારર વેબ સિરીઝ “દશ જૂન કી રાત” આવી રહી છે. જિયો સિનેમા પ્રીમિયમએ પોતાની આ આગામી કોમેડી થ્રિલર સિરીઝનું ટ્રેલર રિલીઝ કરી દીધું છે. જે ઘણું જ મજેદાર છે. ટ્રેલર બાદ બધી જ જગ્યાએ હાલ તેની ચર્ચા થઈ રહી છે.
રાણીગંજ શહેર પર આધારિત આ સિરીઝમાં તુષાર કપૂર અને પ્રિયંકા ચહર ચૌધરી લીડ રોલમાં છે. આ સિરીઝ કોમેડી રજૂ કરવાનો વાયદો કરે છે. એએલટી ડિઝિટલ મીડિયા એન્ટરટેનમેન્ટ લિમિટેડમાં એકતા કપૂરની ક્રિએટિવિટી સાથે તરબેઝ ખાને આ સિરીઝ ડાયરેક્ટ કરી છે. ટ્રેલર સાથે કેપ્શનમાં લખવામાં આવ્યું છે કે, બધાનો શનિ ભારે થવાનો છે. “દશ જૂન કી રાત”, 4 ઓગસ્ટે જિયો સિનેમા પ્રીમિયમ પર.
ટ્રેલરમાં દેખાડવામાં આવ્યું છે કે, પનોતી ‘ભાગ્યેશ’ વિશે બધા વાતો કરે છે. એક એવો વ્યક્તિ જે પોતાના ખરાબ નસીબને કારણે જાણીતો છે. રાણીગંજના લોકો તેની સાથે રસ્તો પસાર કરવાના બદલે ઘરમાં જ રહેવાનું પસંદ કરે છે. તેના પિતાના મૃત્યુના દિવસે જન્મેલા પનોતીના દુર્ભાગ્યને કારણે તેના પિતાનું સિંગલ સ્ક્રીન થિયેટર બંધ થઈ ગયું છે.
પનોતીનું એક માત્ર સપનું છે કે થિયેટરને ફરીથી ચાલુ કરવું અને પોતાના પિતાના વારસાને ફરી સ્થાપિત કરવો. રંગ-બેરંગી પાત્રો અને હસી-મજાક સાથેની આ સિરીઝ દર્શકોને હસવા માટે મજબૂર કરશે. બિગ બોસથી જાણીતી થયેલી પ્રિયંકા અને તુષાર કપૂરે પહેલીવાર સાથે કર્યું છે. ફેન્સ તેમની ઓન સ્ક્રીન જોડીને લઈને એક્સાઈટેડ છે.