પાકિસ્તાનને ઝટકો : ICC ચેમ્પિયન્સ ટ્રોફી રમવા માટે ટીમ ઈન્ડિયા નહીં જાય પાકિસ્તાન !!

પાકિસ્તાનને ફરી એકવાર જોરદાર ફટકો પડ્યો છે. ભારતીય ટીમ ચેમ્પિયન્સ ટ્રોફી 2025 (CT 2025) માટે પાકિસ્તાન નહીં જાય. પાકિસ્તાન ક્રિકેટ બોર્ડ (PCB)એ આ ટૂર્નામેન્ટના આયોજન માટે સંપૂર્ણ યોજના તૈયાર કરી હતી. તેણે આવતા વર્ષે ફેબ્રુઆરી અને માર્ચમાં રમાનારી ટૂર્નામેન્ટનું શેડ્યૂલ તૈયાર કર્યું હતું અને તે શેડ્યૂલને ICC અને ટૂર્નામેન્ટમાં ભાગ લેનારા તમામ બોર્ડને મંજૂરી માટે મોકલ્યું હતું, જે મીડિયામાં પણ લીક થયું હતું. પરંતુ ભારતીય ક્રિકેટ કંટ્રોલ બોર્ડ (BCCI) સાથે જોડાયેલા એક સૂત્રએ જણાવ્યું કે ટીમ ઈન્ડિયા પાકિસ્તાનનો પ્રવાસ નહીં કરે અને ટૂર્નામેન્ટ હાઈબ્રિડ મોડલ પર રમાશે. ન્યૂઝ એજન્સી ANIએ BCCIના સૂત્રોના હવાલાથી આ સમાચાર આપ્યા છે. BCCIએ હજુ સુધી આ અંગે સત્તાવાર નિવેદન આપ્યું નથી.

ચેમ્પિયન્સ ટ્રોફી હાઇબ્રિડ મોડલ પર રમાશે

આ પહેલા પાકિસ્તાનને ગયા વર્ષે એશિયા કપની યજમાની પણ મળી હતી. પરંતુ બીસીસીઆઈએ ટીમ ઈન્ડિયાને ત્યાં મોકલવાનો સ્પષ્ટ ઈન્કાર કરી દીધો હતો, ત્યારબાદ આ ટૂર્નામેન્ટ હાઈબ્રિડ મોડલ પર પાકિસ્તાન અને શ્રીલંકામાં રમાઈ હતી. આ વખતે ચેમ્પિયન્સ ટ્રોફી પણ આ હાઇબ્રિડ મોડલ પર રમાશે. શક્ય છે કે હવે આ ટૂર્નામેન્ટ પાકિસ્તાન અને UAE અથવા શ્રીલંકા દ્વારા સંયુક્ત રીતે યોજવામાં આવે. ન્યૂઝ એજન્સી એએનઆઈએ બીસીસીઆઈના સૂત્રોને ટાંકીને આ માહિતી આપી છે.

ટીમ ઈન્ડિયા છેલ્લે 2008માં પાકિસ્તાન ગઈ હતી

ભારતે છેલ્લે 2008માં પાકિસ્તાનનો પ્રવાસ કર્યો હતો, જ્યારે તે એશિયા કપ માટે પાકિસ્તાન પહોંચી હતી. 2012માં પાકિસ્તાનની ટીમ દ્વિપક્ષીય શ્રેણી માટે ભારત આવી હતી. પરંતુ ત્યારપછી બંને દેશો વચ્ચે કોઈ દ્વિપક્ષીય શ્રેણી થઈ રહી નથી.

પાકિસ્તાન ચેમ્પિયન્સ ટ્રોફીની ડિફેન્ડિંગ ચેમ્પિયન

પાકિસ્તાનની ટીમ ભારત આવીને આઈસીસી ટુર્નામેન્ટમાં રમી છે પરંતુ ભારતીય ટીમે એક પણ વખત ત્યાંની મુલાકાત લીધી નથી. ચેમ્પિયન્સ ટ્રોફીની વાત કરીએ તો છેલ્લી વખત આ ટૂર્નામેન્ટ 2017માં ઈંગ્લેન્ડમાં રમાઈ હતી, જ્યાં પાકિસ્તાને ભારતને હરાવીને ટાઈટલ જીત્યું હતું.

પાકિસ્તાનને હોસ્ટિંગ મળ્યું છે પરંતુ હવે હાઇબ્રિડ તક

2017થી ચેમ્પિયન્સ ટ્રોફી રમાઈ નથી અને લાંબા વિરામ બાદ ICCએ ફરી એકવાર આ ટ્રોફી શરૂ કરી છે, જેનું આયોજન પાકિસ્તાન કરી રહ્યું છે. પાકિસ્તાને લાહોર, કરાચી અને રાવલપિંડીમાં આ ટુર્નામેન્ટનું આયોજન કરવાની યોજના બનાવી છે. પરંતુ ભારતના ઇનકારને કારણે, તેની ઇચ્છાઓ ભંગ થઈ શકે છે અને તેણે ફરી એકવાર હાઇબ્રિડ મોડલના સંદર્ભમાં તેની યોજનાઓ તૈયાર કરવી પડશે.