રાજકોટમાં અધિકારીઓના પાપે જ આગ લાગી

હાઇકોર્ટ સરકાર ઉપર કાળઝાળ : અમે સીટના રીપોર્ટની રાહ નહી જોઈએ, બીજા પાસે તપાસ કરાવીને અમને સત્ય જણાવો

TPO જેવા નાના અધિકારીને પકડી લીધા પણ મોટા માછલા હજુ કેમ નથી પકડ્યા ?
ગેઈમ ઝોનમાં ફોટા પડાવનારા અધિકારીઓ સામે કેમ હજુ પગલા નથી લીધા ?
હાઇકોર્ટે કમિશનરના સોગંદનામા પણ ન સ્વીકાર્યા

રાજકોટના અગ્નિકાંડ મુદ્દે હાઇકોર્ટે આજે ગુજરાત સરકારની ઢીલી નીતિ સામે આકરું વલણ અપનાવ્યું હતું અને કહ્યું હતું કે, અત્યાર સુધી નાના માછલાંઓને જ પકડ્યા છે અને મોટા અધિકારીઓ સામે કોઈ કાર્યવાહી કરવામાં આવી નથી. જે ગેઈમ ઝોનમાં આગ લાગી હતી તેના માટે અધિકારીઓ જ જવાબદાર છે અને તેમની સામે પગલા લેવાવા જ જોઈએ. હાઇકોર્ટે ત્યાં સુધી કહ્યું હતું કે, અમે આ અગ્નિકાંડના અહેવાલ માટે સીટના રીપોર્ટની રાહ નથી જોવાના..હાઇકોર્ટે શહેરી વિકાસ વિભાગના ઉચ્ચ અધિકારીઓ મારફત તપાસ કરાવીને ૧૫ દિવસમાં અહેવાલ રજુ કરવા પણ સરકારને આદેશ આપ્યો હતો.

આજે હાઇકોર્ટમાં ચીફ જસ્ટીસ સમક્ષ સુનાવણી દરમિયાન મહાનગરપાલિકાના કમિશનરનું સોગંદનામુ રજૂ કલરવમાં આવ્યું હતું પણ તે સ્વીકારવાનો હાઇકોર્ટે ઇનકાર કર્યો હતો. હાઇકોર્ટે કહ્યું હતું કે, પહેલા મોરબીની ઘટના બની, પછી વડોદરાની બોટ દુર્ઘટના બની અને પછી રાજકોટમાં અગ્નિકાંડ થયો.. આટલી ઘટના પછી પણ સરકાર બેધ્યાન રહી છે અને નિયમોનું પાલન કરવામાં આવ્યું નથી. હાઇકોર્ટે અગાઉ પણ ટકોર કરી હતી પણ કોઈ પગલાં લેવામાં આવ્યા નથી. મોરબી, રાજકોટ અને વડોદરા ઘટના પરથી સામે આવ્યું છે કે કોર્પોરેશન તેમનું કામ બરાબર નથી કરી રહી.

હાઈકોર્ટે કહ્યું કે, ટીઆરપી ગેમ ઝોનમાં પ્રસંગ માટે ગયેલા સનદી અધિકારીઓ સામે કે જવાબદાર હોય તેવા અધિકારી સામે ડીસિપ્લીનરી પગલાં લેવા જોઈએ અથવા તો તેમની સામે ફેકટ ફાઈન્ડિંગ ઇન્કવાઇરી કરવી જોઈએ.

ગુજરાત હાઇકોર્ટે કહ્યું કે, 15 દિવસમાં તપાસ કરો અને અમને રિપોર્ટ આપો. અમે SIT રિપોર્ટની રાહ નહીં જોઈએ. આ રિપોર્ટમાં દરેક અધિકારીઓના નામ સહિતની માહિતી અમને જોઇએ, અમે કંઈ પણ ચલાવી લેવા માંગતા નથી. SIT એ ડિપાર્ટમેન્ટલ તપાસ નહી કરે. અમે મોરબીમાં પણ એક વર્ષ સુધી રાહ જોઈ હતી.

હાઈકોર્ટની આકરી ટકોર બાદ, રાજ્ય સરકારે દલીલ કરતા જણાવ્યું હતું કે, અમે 9 અધિકારીની ધરપકડ કરી છે. તેના ટપારતા હાઈકોર્ટે કહ્યું કે, એ માત્ર ટાઉન પ્લાનિંગ ઓફિસર છે. મોટી માછલી જે ઓપનિંગમાં હાજર હતી તે ક્યાં છે ? એ લોકો ક્યાં છે ? કેમ તમે એમને હજુ સુધી પકડ્યા નથી ? એ લોકોને ખબર હતી કે આ પ્રકારની કોઈ જગ્યા છે.

હાઈકોર્ટે વધુમાં કહ્યું કે, જો તમે કોઈને 1 રૂમ બાંધતા નહી રોકી શકો તો તેને 10 રૂમ કરતા પણ નહી જ રોકી શકો. આ બાંધકામ રાતોરાત તો નહીં જ થયું હોય. જે રજૂ કરવું હોય બ્લેક એન્ડ વ્હાઇટમાં રજૂ કરો. શહેરી વિકાસ વિભાગના સેક્રેટરીને તપાસ કરવા નિર્દેશ આપીએ છીએ. એક પણ જવાબદારી અધિકારીઓ છૂટવો ન જોઈએ. આ એ કામ નથી જે બાળપણમાં ભૂલથી થાય.

દરમિયાન ગુજરાત હાઇકોર્ટ એડવોકેટ એસો. તરફથી બ્રિજેશ ત્રિવેદીએ કોર્ટમાં રજૂઆત કરી હતી કે, ગુજરાત રાજ્યના મુખ્ય ફાયર ઓફિસર જ અનકવોલીફાઈડ છે.

ફેકટ ફાઈન્ડીંગ કમિટી ૪ જુલાઈએ રીપોર્ટ કરે

હાઈકોર્ટે શહેરી વિકાસ વિભાગના પ્રિન્સિપાલ સેક્રેટરીને તપાસ કરવા નિર્દેશ કરતા કહ્યું કે, 3 સભ્યોની તપાસ કમિટીની રચના કરી ખાતાકીય તપાસ કરો. SIT ને તેમની રીતે રિપોર્ટ રજૂ કરવા દો, અને આ ફેકટ ફાઇન્ડિંગ કમિટીને પણ તેમની રીતે તપાસ અહેવાલ રજૂ કરવા દો. આ સંપૂર્ણ સ્વતંત્ર તપાસ હોવી જોઈએ. 4 જુલાઈના રોજ અમને રિપોર્ટ જોઈએ છે.

રાજ્યભરમાં પ્રિ-સ્કૂલોમાં તપાસનો આદેશ

શિક્ષણ વિભાગના પ્રિન્સીપાલ સેક્રેટરીને જિલ્લા વાઇસ શાળાઓની તપાસ કરવા નિર્દેશ આપતા હાઈકોર્ટે કહ્યું કે, શહેરી અને ગ્રામ્ય કક્ષાએ પ્લે ગ્રુપ, પ્રિ પ્રાયમરી, પ્રાયમરી, સહિતની શાળાઓમાં તપાસ કરો. 3 થી 6 વર્ષની વયજૂથનાં બાળકો ભણતા હોય ત્યાં પણ તપાસ કરવા હાઇકોર્ટે નિર્દેશ કર્યો છે.

હવે સરકારની બકરી ડબ્બામાં
સુઓમોટો ઉપરની સુનાવણી દરમિયાન આજે હાઇકોર્ટે જે રીતે નારાજગી વ્યક્તિ કરી છે તે જોતા હવે રાજ્ય સરકારની બકરી ડબ્બે પુરાઈ છે. અત્યાર સુધી સીટ સહિતના અધિકારીઓ અને મંત્રીઓએ એવું કહેતા આવ્યા છે કે અમે કોઈને છોડશું નહી..પણ મૂળ વાત એ છે કે હજુ સુધી કોઈ મોટા માથાને પકડ્યા પણ નથી. સીટ પણ ચાંચુડી ઘડાવુ છું એમ તપાસ કરી રહી છે ત્યારે હવે આજના હાઇકોર્ટના મિજાજ પછી લાગે છે કે, હવે સરકાર પાસે પગલા લેવા સિવાય કોઈ વિકલ્પ બચ્યો નથી.