રામોજી ફિલ્મ સિટીના સ્થાપક રામોજી રાવનું નિધન : હૈદરાબાદની સ્ટાર હોસ્પિટલમાં લીધા અંતિમ શ્વાસ

પ્રખ્યાત ફિલ્મ નિર્માતા અને મીડિયા ઉદ્યોગસાહસિક ચેરુકુરી રામોજી રાવનું આજે 8 જૂને 87 વર્ષની વયે નિધન થયું છે. શ્વાસ લેવામાં તકલીફ અને હાઈ બીપીના કારણે તેમને હોસ્પિટલમાં દાખલ કરવામાં આવ્યા હતા. તેમની હાલત ખૂબ જ ગંભીર હતી, જેના કારણે તેમને વેન્ટિલેટર પર રાખવા પડ્યા હતા. ત્યારે હૈદરાબાદની સ્ટાર હોસ્પિટલમાં શનિવારે સવારે 3.45 કલાકે તેમણે અંતિમ શ્વાસ લીધા હતા.


રામોજી રાવ કોણ હતા ?

રામોજી રાવ સફળ ઉદ્યોગસાહસિક, ફિલ્મ નિર્માતા અને મીડિયા ટાયકૂન હતા. તેઓ તેલુગુ મીડિયામાં તેમના નોંધપાત્ર યોગદાન માટે જાણીતા છે. તેમનું પૂરું નામ ચેરુકુરી રામોજી રાવ હતું. તેમનો જન્મ 16 નવેમ્બર 1936ના રોજ એક મધ્યમ વર્ગીય પરિવારમાં થયો હતો.

પદ્મ વિભૂષણ એવોર્ડ વિજેતા રામોજી રાવે હૈદરાબાદમાં રામોજી ગ્રુપની સ્થાપના કરી હતી. આ ગ્રુપમાં વિશ્વનો સૌથી મોટો ફિલ્મ સ્ટુડિયો, રામોજી ફિલ્મ સિટી, ETV નેટવર્ક અને ફિલ્મ નિર્માણ કંપની ઉષા કિરણ મૂવીઝનો સમાવેશ થાય છે.

રામોજીના અન્ય વ્યવસાયિક સાહસોમાં ડોલ્ફિન ગ્રુપ ઓફ હોટેલ્સ, કલાંજલિ શોપિંગ મોલ, પ્રિયા પિકલ્સ અને મયુરી ફિલ્મ ડિસ્ટ્રીબ્યુટર્સનો સમાવેશ થાય છે.


વડાપ્રધાન નરેન્દ્ર મોદીએ પણ રામોજી રાવના નિધન પર શોક વ્યક્ત કર્યો
 

વડાપ્રધાન નરેન્દ્ર મોદીએ પણ રામોજી રાવના નિધન પર શોક વ્યક્ત કર્યો હતો. તેમણે કહ્યું કે તેઓ રામોજી રાવના નિધનથી ખૂબ જ દુખી છે. તેઓ એક સ્વપ્નદ્રષ્ટા હતા જેમણે ભારતીય મીડિયામાં ક્રાંતિ લાવી હતી. તેમનું યોગદાન પત્રકારત્વ અને ફિલ્મની દુનિયામાં અમીટ છાપ છોડી ગયું છે. તેમના અથાક પ્રયત્નોને લીધે, તેમણે મીડિયા અને મનોરંજન જગતમાં નવીનતા અને શ્રેષ્ઠતા માટે નવા ધોરણો સ્થાપિત કર્યા. તેમણે કહ્યું કે રામોજી રાવમાં ભારતના વિકાસ માટે ઘણો જુસ્સો હતો. હું ભાગ્યશાળી છું કે મને તેમની સાથે મળવા અને વાત કરવાની ઘણી તકો મળી. આ મુશ્કેલ સમયમાં તેમના પરિવાર, મિત્રો અને અસંખ્ય ચાહકો પ્રત્યે મારી સંવેદના.

કેન્દ્રીય મંત્રી રાજનાથ સિંહે પણ રામોજી રાવના નિધન પર શોક વ્યક્ત કર્યો

રાજનાથ સિંહે પણ રામોજી રાવના નિધન પર શોક વ્યક્ત કર્યો અને કહ્યું કે તેઓ રામોજી રાવના નિધનથી દુઃખી છે. તેઓ તેલુગુ મીડિયાના અનુભવી હતા, જેમણે મીડિયા, ફિલ્મો અને મનોરંજન ઉદ્યોગ પર અમીટ છાપ છોડી હતી. તેમના નિધનથી મીડિયા અને ફિલ્મ જગત માટે મોટી ખોટ છે. દુઃખની આ ઘડીમાં મારી સંવેદના તેમના પરિવાર અને શુભેચ્છકો સાથે છે.

રાવજીના નિધન પર શોક વ્યક્ત કરતા કેન્દ્રીય મંત્રી જી કિશન રેડ્ડીએ કહ્યું કે તેઓ રાવજી રાવના નિધનથી દુઃખી છે. તેલુગુ મીડિયા અને પત્રકારત્વમાં તેમનું યોગદાન પ્રશંસનીય છે. મારી સંવેદના તેમના પરિવાર સાથે છે.

જુનિયર એનટીઆરે શોક વ્યક્ત કર્યો

જુનિયર એનટીઆરએ રામોજી રાવને શ્રદ્ધાંજલિ આપતા તેલુગુમાં એક લાંબી નોંધ લખી હતી. તેણે લખ્યું, ‘રામોજી રાવ જેવા સ્વપ્નદ્રષ્ટા વ્યક્તિ લાખોમાં એક છે. મીડિયા ટાયકૂન અને ભારતીય સિનેમાના દંતકથા, તેમની ગેરહાજરી બદલી ન શકાય તેવી છે. તે હવે આપણી વચ્ચે નથી એ સમાચાર ખૂબ જ દુઃખદ છે. તેલુગુ ફિલ્મ ઈન્ડસ્ટ્રીમાં જ્યારે મારો પરિચય ‘નિન્નુ ચુડાલાની’ ફિલ્મથી થયો હતો તે યાદોને હું ક્યારેય ભૂલી નહીં શકું. તેમની આત્માને શાંતિ મળે અને તેમના પરિવાર પ્રત્યે મારી ઊંડી સંવેદના.