IPLનું દુશ્મન બન્યું વેસ્ટ ઈન્ડિઝ !
ખેલાડીઓની સ્થિતિ `જાયે તો જાયે કહાં’ જેવી થઈ ગઈ
ક્રિકેટ જગતમાં અત્યારે આઈપીએલની ધૂમ છે. આ ટૂર્નામેન્ટમાં દુનિયાભરના ક્રિકેટરો ભાગ લઈ રહ્યા છે અને પોતાની છાપ છોડી રહ્યા છે. આ મુદ્દાને ધ્યાનમાં રાખી ક્રિકેટ બોર્ડસ આઈપીએલ દરમિયાન દ્વિપક્ષીય શ્રેણી રમતા નથી પરંતુ વેસ્ટ ઈન્ડિઝ ક્રિકેટ બોર્ડ જાણે કે આઈપીએલનું દુશ્મન બની ગયું છે. તેણે આઈપીએલ વચ્ચે જ એક શ્રેણીનું આયોજન કરવાનો નિર્ણય લીધો છે.
ક્રિકેટ વેસ્ટ ઈન્ડિઝે સાઉથ આફ્રિકા સાથે રમાનારી ત્રણ મેચની ટી-૨૦ શ્રેણીનો કાર્યક્રમ જાહેર કર્યો છે. આ શ્રેણી તેના માટે ટી-૨૦ વર્લ્ડકપની તૈયારીને ધ્યાનમાં રાખી મહત્ત્વની છે પરંતુ સમસ્યા એ છે કે તે આઈપીએલ દરમિયાન રમાશે.
શ્રેણીનો પ્રથમ મુકાબલો ૨૩ મેએ રમાશે. જ્યારે બીજી ૨૫ અને ત્રીજી મેચ ૨૬ મેએ રમાશે. આ ત્રણેય મેચ જમૈકાના સબિના પાર્કમાં રમાશે. જ્યારે આઈપીએલના પ્લેઑફ ૨૧થી ૨૪ મે સુધી રમાશે. વિન્ડિઝ અને આફ્રિકાના અનેક ખેલાડી આઈપીએલમાં રમી રહ્યા છે અને અમુકની ટીમ આઈપીએલ પ્લેઑફમાં રમી શકે છે એટલા માટે બન્ને બોર્ડને પોતાના મુખ્ય ખેલાડીઓની ઉપલબ્ધતાને લઈને સમસ્યા થઈ શકે છે.
વિન્ડિઝમાં જ આ વખતે ટી-૨૦ વર્લ્ડકપનું આયોજન થવાનું છે. અમેરિકા પણ આ વર્લ્ડકપનું સંયુક્ત યજમાન છે. પોતાના ઘરમાં વિન્ડિઝની કોશિશ ત્રીજો ખીતાબ જીતવાની છે. આ ટીમે ૨૦૧૨ અને ૨૦૧૪માં ટી-૨૦ વર્લ્ડકપ જીત્યો હતો.
